Lektori: Kalaallit Nunaat USA-p rakettinik illersornissaanut pingaaruteqarpoq
Kinamiut sunniuteqarnerat aamma russit issittumi sakkutooqarfiliornerat Pituffimmi sakkutooqarfiup USA-mut pingaasussaanik annertusititsivoq, lektori naliliivoq.
Kalaallit Nunaanni qanoq pisoqarneranik USA-p soqutiginninnera sakkutooqarnikkut tunngavissaqarluarpoq. Forsvarsakademietimi lektori Jon Rahbek-Clemensen taama nassuiaavoq.
USA-p præsidentiata, Donald Trumpip, Kalaallit Nunaata pisiarinerani illuaqutissat aamma naleqqussusaa pillugit siunnersortini oqaloqatigisimagai, Wall Street Journal tallimanngornerup unnuaani allappoq.
Naak Kalaallit Nunaata pisiarineqarnissaa periarfiissaanngikkaluartoq imaluunniit USA-p Kalaallit Nunaani anguniagaanut naammassinninnissamut aqqut ajornaannerpaanngikkaluartoq, Trumpip nunarsuarmi qeqertat annersaannut qiviarnera nalaatsornerinnaanngitsoq, Jon Rahbek-Clemmensen nassuiaavoq.
- Kalaallit Nunaat sakkutooqarnikkut USA-mut immikkut soqutiginartuuvoq, Pituffimmi sakkutooqarfik amerikamiut rakettinut illersorneqarnerannut ilaammat, taanna oqarpoq.
- Qalasersuaq Avannarleq qulaallugu rakettinik saassussinermi sakkutooqarfiup amerikamiut aarlerisaartussaavai.
Siunissami USA-p Ruslandillu akornanni aaqqiagiinngittoqassagaluarpat imaluunniit nuna pissaanilissuaq alla takkutissagaluarpat, USA-p rakettinut illersuutai amerikamiut illersornissaqarnerannut pingaaruteqarput, lektori nassuiaavoq.
Kinap aamma Ruslandip iliuuserisaasa amerikamiut Pituffimmi eqqaanilu qanoq pisoqarneranik aqutsinerannut pisariaqartitsineq annertusitippaa, ingammillu mittarfiit nutaat sanaartorneqarnerinut atatillugu.
- Kinamiut aningaasaliinerisa Kina Kalaallit Nunaanni sunniuteqalersissinnaanera ajornartorsiutaavoq, tamanna Kinap amerikamiut tassaniinnerannik akornusersuinermut immaqa atorsinnaammagu, taanna oqarpoq.
- Tamatuma saniatigut Rusland Issittumi sakkutooqarfiliornikuupput, tamatuma Pituffimmut saassussisinnaaneq periarfissaalersippaa.
- Pituffik atorsinnaajunnaarlugu tupaallatsitsillutik saassussisinnaannginnissaannut isumannaarsinissamut tunngavoq. Taamaaliorniaraanni Pituffiup eqqaani radareqartariaqarpoq, aammalu timmisartuni sorsuutinik russit saassussinerannik pakkersimaartitsisinnaasunik periapallassinnaasunik peqarnissaq.
- Mittarfiit taakku amerikamiut timmisartuinik sullissisinnaanerinik pisariaqartitsipput.
Mittarfiit eqqortumik takissuseqarnissaannut aamma amerikamiut timmisartui malersuutit F-35 sullinniarlugit eqqortunik atortoqarnissaa, kingulleq taakkartorneqartoq tassunga tunngassuteqarpoq.
Kalaallit Nunaata kujataani immami aqqartartut nakkutigineqarnissaannut tunngatillugu, Kalaallit Nunaat tamatuma saniatigut pingaaruteqarpoq.