Lektori inissiat pillugit: Ajorneruleriartussaaq
Kalaallit Nunaanni inissiat nutarterneqarnissaat kinguartinneqartuaannarpat nutarterinissaq akittoriartuinnassaaq. Maanna akisoorujussooreerpoq.
6 milliuunit 18 milliuunit koruunillu akornanni. Inissianik aserfallassimasunik nutarsaanissaq, DTU-mi Inissiat Sanaartornerlu pillugit Institutimi lektori, Tove Lading, malillugu akeqassaaq. AG sapaatip akunnerata siuliani taama allappoq. Kisitsillu piffissap ingerlanerani milliartornavianngilaq.
- Pitsanngoriartornavianngilaq, ajorneruleriartussaaq. Qaliap putuatut annikitsutut aallarteriarluni, qanoq iliortoqanngippat putu allingaluttuinnassaaq. Inissianik nutarsaanissaq teknikkiinnarmut tunngassuteqaannanngilaq, politikkikkulli sammineqartariaqarluni, Tove Lading oqarpoq.
Taanna nassuiaavoq nutaanik sanaartuinnarluni ajornartorsiut qaangerneqarsinnaanngitsoq. Suliassaq annertuallaaqaaq, siunissarlu ungasinnerusoq eqqarsaatigalugu inissiallu aserfallatsiinnarnagit nutarternissaat pitsaaneruvoq.
Inissiat qanoq pitsaassuseqarnissaat, nutarterinerup qanoq akisutiginissaanut aalajangiisuussaaq.
Inissiat qanoq pitsaatigissanersut aalajangertoqartariaqarpoq pilersaarusiortoqarlunilum tassanngaanniillu pitsaassutsimit appasinnerusut nutarsarneqalertariaqarput, Tove Lading siunnersuuteqarpoq.
Qanoq issusaat pillugu nalunaarsortoqanngilaq
Ineqarnermut Naalakkersuisoqarfik 2016-imi suliaqarpoq. Pilersaarusiortoqarpoq, naatsorsuunneqarporlu Namminersorlutik Oqartussat inissiaataanni 6.000-iusuni 5.713-it ima ajortigisut, allaat annariarneqarsinnaanatik. Inissiat taakku ilaat 1.169-it piaartumik ingutsertariaqarput, inissiallu 4.544-it ukiut tallimat 20-llu ingerlaneranni ingutserneqartariaqarlutik.
Ukiut pingasut qaangiutereeraluartut, ingutserinissamut suliaqarneq sumut killinnersoq naatsorsorneqarsimanngilaq. Ineqarnermut Naalakkersuisoqarfik Sermitsiaq.AG-mut taama ilisimatitsivoq, ilanngullugulu ukiup affaata ingerlanerani pilersaarutit nutarterneqassasut ilisimatitsissutigalugu.
Ineqarnermut Naalakkersuisoqarfiup naatsorsuutigaa, Namminersorlutik Oqartussat inissiaataannik aserfallassimasunik nutarternissaq 1,5 milliaardit koruuneqassasoq.
Pitsaanerulissasut
Namminersorlutik Oqartussat 1,5 milliaardit koruuninik akeqassangatitsigaluartut, inissiat aserfallassimasut nutarternissaat 6 milliaardit 18 milliaardit koruunillu akeqassangatinnerullugit, Tove Lading AG-mut ilisimatitsivoq.
- Siullermik Kalaallit Nunaanni inissiat tamakkerlugit naatsorsuuppakka, Namminersorlutik Oqartussat inissiaataat kisiisa pinnagit. Aappaattullu eqqaamaneqartariaqarpoq inissiat qanoq pitsaatigissanersut qanorlu sivisutigisumik atasinnaassanersut naatsorsuunnerlugit. Nutartikkat naqqaniik nutaamik sanaartugaasussatut oqaluuserinngilakka. Aningaasartuutit, atasinnaassusaat pitsaassusaallu ataqatigiittariaqarput, Tove Lading oqarpoq.