Leine: Nunasialittut pissusilersorneq suli atorneqarpoq

Atuakkiortoq Kim Leine qanittukkut Nordisk Rådip Atuakkiortunut Nersornaasiuttagaanik nersornaaserneqarpoq atuakkiaminik Profeterne i Evighedsfjorden, tassani oqaluttuaralugu palasi Morten Falck, 1700-ukkunni Kalaallit Nunaanni angalasimasoq.
– Qallunaat inuiaqatigiinni kalaallini sunniuteqarpallaartalersinnaapput. Qularutiginngilarali qallunaat tunuariassasut kalaallit namminneq nunaminnut akisussaajumalerpata, Kim Leine oqarpoq.
Atuagaq Danmarkimi sammineqalersimavoq, tamatumunngalu pissutaavoq Kim Leine isumaqarmat qallunaat qalliuniarneq aammalu Kalaallit Nunaata Danmarkillu ataatsimut oqaluttuarisaaneranni isumanerluutit sammissallugit nuannarimmatigit.
Nunasiaatillit naakkittaatsut
Atuakkami nunasiaatillit oqaluttuarineqarput inuttut nillertutut misigissuseqanngitsutullu, tamannalu nassuiaatissaqarpoq, atuakkiortoq oqarpoq:
– Kalaallit ukiuni untritilinni arlalinni maani najugaqarsimasut avatangiisinullu naleqqussarsimallutik, qallunaat atuakkiami misigittaatsuupput. Nunamit pukkitsumit kiattumillu tikipput nunamut, tutinerlunneq toqumik kinguneqarsinnaasumut. Allanngornikkut inuit naakkittaatsunngortarput. Misigissuseqarnertik annaasarpaat annannissartik sammilersaramikku. Inuimmi taamaattarput. Inuit misigissutsiminnik inuppalaassutsiminnillu attassisut annanneq ajorput. Inuilli annattut misigittaatsunngorlutillu naakkittaatsunngortarput, atuakkiortoq isumaqarpoq.
Inoroorsaarfigitinneq misigiuk
– Ullumikkut qallunaat Kalaallit Nunaanniittut suli mianersorpallaaqaat. Innuttaasunut kalaallinut akuleruttariaqarput. Kasuttornissaminnut kalaallillu inoroorsaarnerannik misigisaqarnissaminnut tunuarsimaarpallaaqaat, Kim Leine oqarpoq, taannalu Danmarkimiikkaangami kalaaliusutut misigisimasarnerarpoq.
Atuakkiaa "Profeterne fra Evighedsfjorden" siullermeersumik nersornaaserneqanngilaq. Qallunaat atuakkiortunut nersornaasiuttagaannik arlalinnik nersornaaserneqareersimasoq.