Legatit: Ilinniartut sisamat takorluukkatik piviusunngortippaat
Ilinniartut sisamat nunani allani Korea Kujallermi, New Yorkimi, Torontomi aamma Sydneymi ilinniarnissaminnut periarfissaqalerput.
Legatit katillugit 300.000 koruunit Aningaasaateqarfiup Ivalo & Minik, ukiup affakkaartumik ataatsimiinnermini agguaateqqammerpai.
Legatit tamakkiisumik aningaasalersorneqarput tunissutinit ukunanngaanneersunik Royal Arctic Line A/S, Royal Greenland A/S, Grønlandsbankens Erhvervsfond aama NunaFonden, aningaasaateqarfimmit tusagassiuutinut nalunaarummi tamanna ilisimatitsissutigineqarpoq.
Siulersuisut siulittaasuat Minik Rosing tunniussinermut atatillugu ima oqapoq:
- Aningaasaliisartugut nersualaarusuppakka aningaasaliinermikkut inuiaqatigiinnut akisussaaqataanertik takutimmassuk. Aningaasaliissuteqartanngitsuuppata Aningaasaateqarfik Ivalo & Minik legatinik tunniussaqartarsinnaanavianngikkaluarpoq taamaasillunilu inuusuttut takorluugaat piviusunngortinneqarsinnaasarsimassanngikkaluarput aamma aappaatigut Kalaallit Nunaat ilinniarluarsimanerusunik innuttaqarsimassanngikkaluarpoq. Taamaattumik uanga isumaga naapertorlugu tamatta inuiaqatigiillu ataatsimut isigalugit iluaqutissinneqarpugut.
Upernaaq manna legatinik pissarsisut
- Michael El-Madani Platou legatimik pissarsivoq Sydkoreami Pusan National Univeritymi koreami pissutsit pillugit masterinngorniarnissaminut.
- Minik Bidstrup Petersen legatimik pissarsivoq ICP-mi– International Center of Photography i New Yorkimi- assiliineq ilisimatusarfigissallugu.
- Sussi Jensen legatimik pissarsiavoq kandidatinngorniarnissaminut Torontomi Translationa Studiesimi York Universitymi Torontomi Canadamiittumi.
- Lisa Ivalu Lind Jensen legatinnappoq Master i Master in Public Health Program på University of New South Wales i Sydney, Australiamiittumi, masterinngorniarnissaminut.
Aningaasaateqarfik Ivalo & Minik ingerlatiinnassavaa legatinik agguaasarnini. Tulliani qinnuteqarnissamut killiuvoq 1. oktobari 2019, tassunga atatillugu siulersuisut qilanaarput qinnuteqaaterpassuarnik takunissaminnut.