Legatit 350.000 kr.-t sinnerlugit nalillit agguaanneqartut: Ivalo & Minik Fonden agguaasuuvoq

Kalaallit angusaqarluarusussusillit arfinillit nunani allani ilinniarnissaminnut Ivalo & Minik Fonden-imit legatinnapput.

Ilinniartut arfinillit naalagaaffeqatigiinnerup avataani ilinniassallutik toqqaasimasut Ivalo og Minik Fondenimit legatinik 350.000 koruunit sinnerlugit nalilinnik tunineqarpu.

Minik Rossen, Ivalo og Minik Fondenip siulersuisuini siulittaasoq, tusagassiorfitsigut nalunaaruteqarnermi oqarpoq, legatimik tunniussinerit tamaasa nuannaartarlutik.

- Misigisarparput, legatit tunniussagut, ilinniartut pilerigilluinnakkaminnik ilinniarnerminni pikkorissarnissaannut iluaqutaalluartartut. Pilersinneqarattali legatinik 60-ingajannik tunniussisimanerput tulluusimaarutigeqaara, taanna oqarpoq.

Siulersuisuni siulittaasup tassunga atatillugu aamma Royal Greenland, Royal Arctic Line, NunaFonden aamma Grønlandsbankenip inuussutissarsiornermut aningaasaateqarfia ukiut tamaasa Ivalo og Minik Fondenimut aningaasatigut tapiissuteqartarnerannut qujaffigai.

Linda Lyberth Kristiansen Ilisimatusarfimmi kulturimut aamma inuiaqatigiilerinermilu
kandidatinngorniarnerminut ilaatillugu semesterimi ataatsimi Norgemi Arktisk Universitetimi Tromsø-miittumi atuarnissaminut legatimik tunineqarpoq.

Maria Lyberth Campus Kujallermi Adventure Guide-itut ilinniarnermini ingerlaqqissutitut ukiuni marlunni Finland-imi Kronoby folkhögskola-mi ilinniaqqinnissaminut legatimik tunineqarpoq.

Ninni Jeremiassen ”environmental pollution and toxicology” Norgemi UNIS-imi (The University Centre ind Svalbard) atuagarsornissaminut, PhD-iliornermi ilaanut qulequtaqartumut: ”Long-term leaching dynamics of lead, zind and fluorine from waste rock at Ivittuut mine, South Greenland” legatimik tunineqarpoq.

Pipaluk Kristensen Ilisimatusarfimmi Oqaasilerineq, Atuakkialerineq, Tusagassiuutilerinerlu pillugit Kandidatinngorniarluni ilinniarnermi ilaatut, Islands Universitet-imi semesterimi ataatsimi atuarnissaminut legatimik tunineqarpoq.

Victor Langholz USA-mi Oklahoma University-timi Business Administration ilinniarnermi ilaatut, Australiami Wollongong Universitet-imi semesterimi ataatsimi ilinniarnissaminut legatimik tunineqarpoq.

Vivi Vold USA-mi Davis-imi University of California-mi semesterit marluk ilinniarnissaminut, PhD-liornermi ilaanut atassuteqaatit sunniivigeqatigiinnerullu, ilisimatuussutsikkut misissuinermi ilisimatusarnermilu immikkuullarissumik qanoq pisoqartarnersoq Kalaallit Nunaanni ilinniagaqarnermi inuit ilisimatusarnerullu
akornanni – ilinniartut ilisimatuullu akornanni.

Ivalo og Minik Fonden-ip siulersuisui legatinik agguaassissallutik ukiumut marloriarlutik naapittarput, Minik Rosingilu neriuppoq tulliani agguaassinissamut, qinnuteqarnissamut 15. februar 2023 killeqartumut, amerlasuunik pitsaasunillu qinnuteqaatinik tigusissallutik.

Powered by Labrador CMS