Larsêraq Skifte eqqaaniarneqarpoq
Eqqaaniutit arlallit ersersippaaq Larsêraq Skifte inuk anguniagaqartuusoq siumullu isigaluni siuttuusoq.
Arctic Circle Race Larsêraq Skiftep suliaasa annersaasa ilagaat. Arctic Circle Racellu siulittaasua, Jens Klaus Lennert kajumissutsiminnik suliaqartut siulersuisullu sinnerlugit ima allappoq:
Tupinnaannartumik apummut, pinngortitamut assigisaannullu tunngassutilinnik ilisimasaqarpoq inuppassuarnut iluaqutissatut tunniussimasaanik. Tassami inuttut pingaartitaraa takutissallugu,
misigitissallugulu uagut kalaallit suleqatigiinnitsigut kaammattoqatigiinnitsigullu anguniakkatsinnik angusaqarsinnaasugut, aamma aqqutit ilungersunartut aqqusaaraluarutsigilluunniit.
Larsêqqap nunarsuarmi sisoraatinik oqilaniunnerit sakkortunersaat pinnernersaallu Arctic Circle Race nukippassuit atorlugit piviusunngortikkamiuk, aamma piumassutsimik ikiuuttartorpassuit nunanillu assigiinngitsorpassuarnit arpaqaaasartut inuunerminni puigugassarinngisaannik tunivai, tamannalu ukiut 23-it kingulliit taamatut ingerlasimavoq. Larsêqqamut annikinngitsumik qujassutissaqarpugut Qeqqata Kommunia nunarpullu taamak pitsaatigisumik nalilerneqarsinnaanngitsumillu nunarsuatsinnut
nittarsaanneqartarmat. Minnerunngitsumik uagut kalaallit nunarsuarmioqataanerput misigitinneqartarmat – naak inuiaqatigiinnguit amerlavallaanngikkaluarluta, uppernarseqqittaratsigu sunniuteqaqataasinnaanerput.
Arctic Circle Race-p ingerlanneqartarnerani kissalaarneq, ataatsimooqatigiinneq qiimanerlu puigunaatsoq piumassutsimik ikiuuttartorpassuit arpaqataasartorpassuillu akornanni puigunaatsumik misigisassaavoq, tamannalu Larsêqqap anersaavanut tulluarnerusinnaanngilaq.
Arctic Circle Race-imi ukiorpassuarni suleqatigiissimanitsinni, ilaatigut avatangiisit nalaatallu imaannaanngitsut aqqusaartaraluarlugit nuannaarnerup piliaanik killitsinnerit amerlanerungaarput. Minnerunngitsumik piumassutsiminnik ikiuuttartut ajornartorsiorfinni tupinnaannartumik tunniusimallutik takutittagaat eqqarsaatigalugit. Piumassuseqaraanni ikioqatigiinnikkut sunarujussuaq anguneqarsinnaavoq, inuuiaqatigiinnullu pisuunnguutaasarluni. Tassani Larsêqqap maligassiuisimanera nalilerneqarsinnaanngilaq, aammalu pisinnaatilluta puigorneqassanngilaq.
Suliniut alla nutaaq Larsêraq Skiftep suliniutigisaa tassaavoq Sikumiut, Sisimiut eqqaani nunat tamalaaneersunit tikinneqartartussamik sisorarnermik timersorfimmik pilersitsinissaq. Larsêraq Skiftep suliniutini ukiuni aqqaneq-marlunni ingerlatereerlugu piviusunngortinneqarnissaa anguniarlugu sapaatiumamt kingullermik inunnut nutaanut sulisussanut tunniussimavaa.
Svend Hardenberg, Sikumiut ApS-imi siulittaasoq ilaatigut ima allappoq:
Tamatta upperilluinnarsimavarput piffissaq nuannerluinnartoq ornillugu. Piumassuseqangaarluta Larsêqqap Sisimiut ungasinngisaani sisorarluni takornariartarfissamik takorloorsimasaa “Sikumiut” inaarsarparput. Eqimattami peqataasut suleqataasullu tamarmik Larsêqqamut tinguartilluinnarput, sulerusunneranut sumiiffiullu qanoq atornissaanut takorluuineranut, aammali inuttut qanorissusaanut. Larsêraq angutaavoq ilisimasanik ulikkaartoq, oqaluttuaatiminik misilittakkaminillu avitseqatiginnittartoq. Ullut ingerlapput, ataasinngornermilu Larsêqqap ilaquttani unnukkorsioqatigereerlugit illuminut angerlarsimavoq, illullu qaliata aputaa nivallugu piialerlugu. Nivannermini ammut nakkarsimavoq, iteqqinngitsoorlunilu apriilip qulingani ualikkut toqulluni.
Arlallit Larsêraq inuttut kialaartutut ilisimavaat – sulerusussuseqartutut ilisimaneqarpoq, anguniagalik takorluuisinnaassuseqartoq, amerlasuunillu sunniisimalluni isumassarsititsisarsimavoq. Oqaasiinnaat atorlugit Larsêraq nassuiaruminaappoq, najukkani inuiaqatigiillu, qimaasuunerminik sunnersimasaramigit, kulturimik suliaqarnikkut aammali timersornerup silarsuaani.