Lars Løkke: Namminersulivinnissaq puiguinnarsiuk
Danmarkimi ministeriunerusimasoq Lars Løkke Rasmussen isumaqarpoq, Kalaallit Nunaata namminersulivinnissaa piviusorsiortuunngitsoq. USA-mit soqutigisat amerlavallaaqaat, taanna oqarpoq.
Lars Løkke Rasmussen Naalagaaffeqatigiinni arlalerialuni siuttuusarsimavoq, nunanullu allanut tunngasutigut politikki pineqaraangat Savalimmiut Kalaallillu Nunaata peqataatinneqarnerusarnissaannik oqariartuuteqartarsimalluni.
Kalaallilli Nunaata namminersulivinnissaa pillugu apeqqut pineqartillugu isumaqarpoq, tamanna piviusorsiortuunngitsoq.
- Kalaallit Nunaata namminersulivinnissamik takorluugaqarnini puiguinnarsinnaavaa. USA-mimmi tamanna pinaveersaartinneqassaaq, taanna oqarpoq.
Peqatigitillugu Kalaallit Nunaata Danmarkillu ammanerusumik toqqaannarnerusumillu oqaloqatigiittarnissaat piumaneruaa. Politikken allappoq.
Danskit akuliunnissamut annilaangasartut
Ministeriunerusimasup isumaa malillugu, Kalaallit Nunaat pineqartillugu Danmarkimit akuliunnissaq suli annilaanngatigineqartartoq, tamannalu peqqinnanngitsoq oqaatigalugu. Assersuutitut meeqqanut inuusuttunullu isumaginnittoqarfik erseqqissaatigaa, pisimasut sakkortoorujussuit ilaat nunami maani Danmarkimilu tusagassiorfinnit sammineqangaatsiarsimasut.
-Kalaallit Nunaanni inuiaqatigiit maanna ingerlanerat pitsaanerulersimavoq, isumaqarpungalu Kim Kielsen pisunut takunnissinnaalluarsimasoq. Paqumiginnittarneq qimatsinniarsarisimavaa. Pisimasulli ilaat - assersuutigalugu Danmarkimi pisimasuuppata - uivernersuaqarsimassagaluarpoq. Danarkimi ministerinik naalakkersuisunillu akeqarsimagaluartunik, Lars løkke Rasmmussen Politikenimut oqapoq.
Taanna aamma isumaqarpoq, Danmarkip Kalaallillu Nunaata akornanni pissutsit oqallisigineqartarnerat, naminnersulivinnissaq pillugu eqqarsaatinit aamma Danmarkip kisermaassilluni nunanut allanut tunngasutigut politikkimik isumaginnittarneragaaneranit aqunneqarpallaarsimasut.
Danmark peeruppat USA tiguaassasoq
Lars Løkke Rasmussenip erseqqissaatigaa, isumannaallisaanermut politikkimi sammineqartartut ammanerusumik oqaloqatigiissutigineqartarnerisigut, Naalagaaffeqatigiinni suleqatigiinneq aamma namminersulivinnissamik oqallinneq pitsaanerusumik ingerlanneqalissasut. Taassuma qularutiginngilaa, Danmarkimit avissaarluni namminiilivittoqarpat, USA annertunerusumik pinngitsoorsinnaajunnaarneqassasoq.
- Kalaallit Nunaata namminiilivinnissani pisortatigoortumik aalajangissappagu, Kalallit Nunaat ullumikkut sanilliullugu annikinnerusumik oqartussaaffeqalissaaq. Tamanna erseqqilluinnarpoq – globusi takuinnassuarsi. Kalaallit Nunaat amerikap avannarliup nunavittaaniippoq.
- Kalaallit Nunaata sunniutaa annertuallaarpoq, arlaata namminiilivinnissamut akuersaarsinnaaneranut. Taamaattoqarsinnaanngilaq – amerikamiummi tamanna soqutigisaraat, Lars Løkke Rasmussen Politikenimut oqarpoq.