Skip to main content

Lars-Emil: Kim Erillu akisussaaffimmik maanna tigusisariaqalerput

Umiarsuarmi marlunnik naalagaqarneq pitsaasuunngilaq. Tamanna ajortumik kinguneqartarpoq, Kalaallit Nunaanni politikkeritoqaq, siusinnerusukkut Naalakkersuisuni siulittaasuusimasoq Lars-Emil Johansen partiitoqqani Siumut ajornartorsiorluinnartutut isumaqarfigalugu taamatut oqarpoq.

- Siumut nuna tamakkerlugu ataatsimeersuarmat aalajangiunneqarsimasut atuutsinneqalersimannginnerat naammagineqarsinnaanngilluinnarpoq, Lars-Emil Johansen Siumut sinnerlugu qinigaaqqaarsimanerminit ukioq manna apriilip 16-iani ukiunik 50-inngortorsiortussaq erseqqissaavoq.

Novembarip qaammataani siulittaasunngorniuttoqarmat Erik Jensenimut tapersersuisimavoq, qaammatilli marluk sinnerlugit ingerlareersut pikkugivallaarunnaarsimavaa.

- Maanna qaammatit marluk ingerlareerput, Erik Jensenilu suli eqqissisitsisinnaasimanngilaq. Aaqqiissutissarsiortoqartussaallunilu ataatsimut siunnerfeqarnissaq pineqarpoq, pingaartumik partiinik allanik suleqateqartussaatilluni, Lars-Emil Johansen ukiumi nutaami Erik Jensenip partiinik allanik aatsaat isumaqatiginninnialersimaneranik paasinnissinnaanngitsoq oqarpoq.

Kielsenip aamma akisussaaffigigaa

Politikkeritut soraarninngorsimasup Erik Jensenip patajaallisaasinnaannginnera kisiat isornartorsiunngilaa, Naalakkersuisulli maanna siulittaasuat Kim Kielsen aamma isornartorsiorpaa.

- Partiimi siulittaasuuneq aamma Naalakkersuisunut siulittaasuuneq kisimik pisussaaffiunngillat, ataatsimulli aaqqiissutissarsiorluni aamma sulisoqartussaavoq, Lars-Emil Johansen 1988-imiit 1991-imut Jonathan Motzfeldtip Naalakkersunut siulittaasuunerani partiimi siulitaasuusimasoq erseqqissaavoq.

- Taamanikkut aamma arlalippassuartigut isumaqatigiinngissuteqartarpugut, ataatsimulli siunnerfissarsisinnaasarluta. Tamannami pisussaaffigisimavarput, Lars-Emil Johansen timmisartoqarfissanut annertuunik aningaasaliissuteqartoqarsimaneranik Kuannersuarnilu aatsitassarsiorniarneq pillugu annertuumik oqallittoqarneranik tikkuussisoq eqqaamasalikkersaarpoq. Tassani pilersaarutit malillugit Qaqortumi timmisartoqarfiliornissap piviusunngortinneqassanersoq pillugu ernumassutigaa, timmisartoqarfissarmi Nunatta Karsianit aningaasaliiffigineqartussaammat.

Qinersisoqarsinnaaneranik apeqqut kisimi pineqanngitsoq

Qinersisoqarnissaanik nalunaaruteqarsinnaaneq kisimi pineqanngilaq, naak tamanna aqqutissatuatut inerniliunneqarsinnaagaluartoq, Naalakkersuisuni siulittaasuusimallunilu partiimi siulittaasuusimasoq oqarpoq.

- Kommunimut qinersisoqangajalerneranut peqatigitillugu coronap atuunnerani qinersisitsinissaq pitsavallaanngilaq. Taamaammat Siumumi ajornartorsiortoqarnerata aaqqiiffigineqarnissaanut annertuumik akisussaaffeqartoqarpoq, sLars-Emil Johansen oqarpoq.

Kalaallit Nunaanni politikkikkut "dronningimut nalunaaruteqarsinnaanerup" periarfissaannginnera uggoraa, tassa assersuutigalugu ombudsmandip imaluunniit Kalaallit Nunaanni Rigsombudsmandip qinersisoqanngikkaluartoq amerlanerussuteqartumik naalakkersuisooqatigiiliornissamut tunngavissaqarneroq maanna partiiusut akornanni naalakkersuisooqataasinnaasunik misissuisoqarsinnaannginnera uggoraa.

Siumumi ajornartorsiutaasartorpassuit

- Siumut ajornartorsiuterpassuaqartarluni partiiuvoq sakkortuuliorfiusartutut ilisimaneqartoq. Partiip oqaluttuarisaanerani maanna pisoq ajornerpaanersoq oqaatigisinnaanngilara. Partiinut allanut ajornartorsiumminnik innuttaasunut toqqorterisartunut sanilliullugu isumaqatigiinngissutinik aaqqiissuteqartarnerput ileqquuvoq. Ullumikkulli taamatut inissisimasoqarnera attanneqarsinnaanngilaq, Lars-Emil Johansen nuna tamakkerlugu ataatsimeersuarnermi politikkikkut siunnerfissatut aalajangiunneqarsimasut atuutsinneqalernissaannut qilanaartoq erseqqissaavoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER