Lars-Emil: Kalaallit Nunaata tamarmiusup eqqaassutissaq qanoq pineqassanersoq aalajangiiffigisariaqarpaa
Politikkeriusimasoq Lars-Emil Johansen isumaqarpoq, illoqarfiit pingaarnersaat Kalaallit Nunaannut tamarmiusumut takussutissaasoq. Taamaammat innuttaasut tamarmik Hans Egedep eqqaassutissaata qanoq pineqarnissaa aalajangiiffigisariaqaraat.
Kommuneqarfik Sermersooq Hans Egedep eqqaassutissaa nuunneqassanersoq pillugu innuttaasunik taasitisiniarluni suliamik aallartitsisimavoq.
Nunalli tamarmiusup aalajangiinermut peqataatinneqarnissaa pingaaruteqarpoq, politikkeriusimasoq naalakkersuisunullu siulittaasuusimasoq Lars-Emil Johansen oqarpoq.
Lars-Emil Johansen naapertorlugu, illoqarfiit pingaarnersaata nunamut tamarmut sinniisuunerata eqqarsaatigineqarnissaa pingaaruteqarpoq. Eqqaassutissallu illoqarfiit pingaarnersaanni ullumikkut nuimasumik inissisimanera eqqarsaatigalugu, pineqartoq nunami tamanit isummerfigineqartariaqarpoq:
- Nuuk Kalaallit Nunaanni illoqarfiit pingaarnersaraat. Taamaammat Kalaallit Nunaata tamarmiusup aalajangiiffigeqataaffigisariaqarpaa, Hans Egedep eqqaassutissaanik takutitassiaqassanersugut, Lars-Emil Johansen oqarpoq.
Eqqaassutissaq nuunneqartariaqartoq
Politikkeriusimasup qularutiginngilaa eqqaassutissap nuunneqartariaqarnera. 1970-imi politikkeritut qinigaarlaajulluni pisortatigoortumik suliaasa siulliit ilagisimavaat, Hans Egedep tikinneranit ukiunik 250-nngortorsiornermi nalliuttorsioqataaneq.
Taamanikkut nalliuttorsiorneq Dronning Margrethep, suli kunngissaalluni peqataaffigisaanik, Nuup Timersortarfiani nutaarsuusumi pisimavoq.
- Taamanikkut Hans Egede pillugu isonartulimmik aamma oqaluppunga, Lars-Emil Johansen oqarpoq, nangillunilu:
- Eqqaassutissaq assersuutigalugu Hans Egedep oqaluffianut imaluunnii Norgemit aggerfianut Bergenimut nuunneqartariaqarpoq.
- Imminut aperisariaqarpoq, angut Kalaallit Nunaanni innuttaasunik kristumiunngortitsinermi saniatigut kalaallit kulturiannik kinaassusaannillu tutisisimasoq ataqqineqartariaqarnersoq, Lars-Emil Johansen oqarpoq.