isumalioqatigiissitaq
Lars-Emilip marloqiusamik atorfeqarnissaa ataatsimiititaliap akueraa
Tunngaviusumik Inatsimmut Isumalioqatigiissitami nutaami siulittaasuuffik assortuussutaasoq Inatsisartut siulittaasuata Lars-Emil Johansenip siulittaasunngorfigisinnaagaa akuerineqarpoq
Lars-Emil Johansenip Inatsisartunut siulittaasuunerata Tunngaviusumik Inatsimmut Isumalioqatigiisitami siulittaasunngorsinnaanera, Qinigaanerup Misilinneqarnissaanut Ataatsimiititaliami amerlanerussuteqartut aalajangerpaat.
IA-p isumaa pissangassutaasoq
Ataatsimiinneq sioqqullugu aalajangerneqartussaq pissangassutaavoq, tassami IA-mi ilaasortap Mimi Karlsenip Inatsisartut siulittaasuat Tunngaviusumik Inatsimmut Isumalioqatigiissitami siulittaasuunissaa ataatsimoortinneqarsinnaanngitsut siornatigut oqaatiginikuummagu.
Pingaarutilimmik taasisoqarnissaa sioqqullugu partii IA ataatsimiippoq, tassanilu Siumup Lars-Emil Johansenimik taasinera malinneqartariaqartoq aalajangiunneqarpoq.
Mimi Karlsenip saniatigut Lars-Emil Johansenimik uku tapersiipput: Jens Immanuelsen, Siumut, Anthon Frederiksen, Partii Naleraq, aamma IA-meersoq Iddimanngiiu Bianco.
Atuaruk: Atorfimmut pingaarutilimmut tulluartuua?
Lars-Emil Johansen politikeriuvoq namminersulivinnissap sukkasuumik anguniarneqarnissaanik kissaateqartoq, tamannalu taannarpiaq isumalioqatigiissitami pingaarutilimmi siulittaasuunissa inuit nittartakkatigut attaveqaqatigiittarfiini annertuumik oqallisigineqarnikuuvoq.
Taasititsineq oqallinnerlu
Sermitsiaq.AG-mi taasititsisoqarnerani Lars-Emil Johansenip Tunngaviusumik Inatsimmut Isumalioqatigiisitami siulittaasunngornissaa 80 procentiisa akerleraat. Taasititsinermut oqaaseqarfissami oqallinneq uummaarippoq, ingammik marluk ajornartorsiutaatinneqarput.
- Lars-Emil Johansen utoqqaavallaarpoq.
- Lars-Emil Johansen Inatsisartunut siulittaasuullunilu Tunngaviusumik Inatsimmut Isumalioqatigiisitami siulittaasuusinnaanngilaq.
Kingornalu partii Siumut siulittaasumut sassartitassamut tunngatillugu avissaartuussimasut paasinarsinikuuvoq. Taasinerullu ataasiinnaap Lars-Emil Johansen siulittaasutut Siumup siulittaasutut sassartinnissaanut amerlanerussummik qulakkiissuppaa.
Siulittaasoqarfik ataatsimiippoq
Inatsisartut Siulittaasoqarfia ullumi Tunngaviusumik Inatsimmut Isumalioqatigiissitaq pillugu ataatsimiippoq.