Skip to main content

Lars-Emil: Politikkeritut ataatsimeersuaqataanera kingulleq

Siumumik pilersitseqataasimasoq, Lars-Emil Johansen, partiip Sisimiuni ataatsimeersuarnerani takussaavallaarsimanngilaq. - Polikkimi uninnissaq piffissanngorpoq, taanna politikkeritut naggataamik ataatsimeersuaqataanini pillugu oqarpoq.

- Siumumi allamik siulittaasutut qinersisoqarsimanissaa tulluartinnerungaluarpara. Kisianni partiimi amerlanerussuteqarluartut Kim Kielsenip ingerlaannarnissaa aalajangerpaat. Taamaammaat qinersinerup inernera ataqqiinnartariaqarpara.

Siumumik pilersitseqataasoq, Lars-Emil Johansen, Kim Kielsenip partiimi siulittaasutut tulluarnersoq aperineqarami Sermitsiaq.AG-mut oqarpoq.

- Siulittaasussamik allamik qinersisoqarnissaa sukataarussimanngilara. Kim Kielsen arlalinnit isornartorsiorneqartarsimavoq, siulittaasutulli suli ineriartorluni. Taanna partiimut sulilluarpoq. Aammattaaq qularutiginngilara siulersuisunngortut partiimik ingerlatsinissaanik piginnaasaqarnerat, taanna erseqqissaavoq.

Atuaruk: Kim Kielsen siulittaasunngorniunnermi ajungaallualaavippoq

- Vittus Qujaukitsoq siulittaasuutikkusunnerungaluarpiuk?

- Vittus Qujaukitsoq siulittaasussatut qiningassanngortimmat nuannaarutigisimaqaara. Siulittaasunngorniuttoqaleraangat Siumut eqeertarpoq. Siulittaasunngorniunneq Nunatsinni nakkutigineqarluarsimavoq, partiilu tassani soqutigineqalertarpoq. Tassani takuneqarsinnaavoq partii Nunatta pisariaqartikkaa. Siulittaasunngorniunnermi Jonathan Motzfeldtillu siulittaasunngorniussimanitsinnik eqqaasippaanga, Lars-Emil Johansen, partiimi kina siulittaasutut orniginartinnerullugu oqaatiginngikkaluarlugu oqarpoq.

- Siumup ilisarnaatigaa sakkortuumik siulittaasunngorniutsitsisarnera, tassani isummanik akerleriiffiusinnaasarluni. Kisiannili tamanna naammassingaangat sulinerit aallartinneqartarput, isumallu akerleriiffiusut naapeqatigiiffigisinnaasaaannik ujartuisoqalertarluni. Taamaammaat neriuutigaara ataatsimeersuarneq ataatsimoorfiusumik qimassagipput, taanna oqarpoq.

Atuaruk: Kim Kielsen qinigaaqqinnermi kingorna: Inerniliussaq akisussaaffiliivoq

- Ataatsimeersuarneq qanoq nalilerpiuk?

- Partiip ingerlalluarnera assut tulluusimaarutigaara. Partiip pilersinneqarneranit ukiut 40-t qaangiussimalerput. Ataatsimeersuartarnernulli allanut sanilliukkuma aatsaa taama akuunngitsigaanga. Tamatumunnga Inatsisartunut qinersisoqaleqqinnissami qinigassanngorteqqinniarnanga aalajangersimanera pissutaavoq. Naggataamik ataatsimeersuartunut peqataavunga, Lars-Emil Johansen oqaluttuarpoq.

- Qinigassanngorteqqinniarnak qanga aalajangerpiuk?

- 70-liinerma kinguninngua aalajangerpunga. Siullermillu ukiut 46-t matuma siorna qinigaaqqaarnera nuannersortarivaa. 1946-mimi inunngorpunga. Ukiunili taama amerlatigisuni politikkimeereerlunga unissallunga aalajangerpunga.

Atuaruk: Ajorsarujussuaraluartoq: Tunniutiinnanngilanga

- Politkkimik suliaqareeruit sulerissavit?

- Sulerissanerlunga suli aalajangerfiginngilara. Kisianni inuussutissarsiornikkut arlalinnik periarfissarpassuaqarpoq, tassani siunnersortitut ingerlasinnaavunga imaluunniit nammineq suliffeqarfimmik pilersitsinnaallunga. Inuuninnillu atuakkiara nangeqqissavara. Atuagaq uannut tunngasoq saqqummersinneqarnera pillugu unitsikkallarsimavara.

- Una ataatsimeersuarneq siunissami qanoq eqqaasassuviuk?

- Politikkeritut naggataamik ataatsimeersuarnernut peqataasimallunga. Partii inuunni initoorujussuuvoq. Allaanngilaq timima ilagiinnaraa. Siunissami tulluusimaarutigalugu ataatsimeersuarneq eqqaasarumaarpara, Lars-Emil Johansen oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER