Inatsisartut
Lars-Emil naveersivoq
Siumumi politikeritoqaq, sapaatip akunnerata naanerani 70-iliisussaq, Naalakkersuisut namminersulernissamut sulineq salliutinngimmassuk isornartorsiorpai
Lars-Emil Johansenip inuuissiornissaminut atatillugu AG-mi apersorneqarnermini ilaatigut partiimi siulittaasuminut aamma Naalakkersuisut siulittaasuannut, Kim Kielsenimut, ilaatigut sakkortuumik isornartorsiuivoq, namminersulernissap politikkikkut sulissutigineqarnera ukkatarivallaannginnera pissutigalugu.
Soraarsitsinerit
Siumumi politikeri nuimasoq, ulluinnarni Inatsisartunut siulittaasuusoq, Namminersorlutik Oqartussat allattoqarfiani atorfilittanut sakkortuumik isornartorsiuivoq. Soraarsitsiortornissat oqaluuserineqarsinnaasut, Lars-Emil Johansen isumaqarpoq.
Atuaruk: Lars-Emil: Aleqa Folketingimi atasinnaanngitsoq
Susoqanngitsoq
- Ukiut 20-it qaangiupput Naalakkersuisuni siulittaasuujunnaarninniit. Taamanikkut isumaqaraluarpunga namminiilivinnissamut piareerluinnalersugut. Kisianni susoqanngilaq. Aatsitassarsiorniarluni qinnuteqaatit sivittuloorunneqartarput mittarfiliorniarlunilu aalajangertoqareeraluartoq susoqarani. Aningaasarsiornikkut inuussutissarsiutinillu nutaanik siuarsaaneq allaffissornerujussuarmit unitsinneqarsimavoq. Tamanna toqqissisimananngilaq. Allaffissorneq ineriartornermut aporfiliisussaanngilaq. Allaffissornerup suliassaraa aalajangiuteriikkat piviusunngortinneqarnissaat, Lars- Emil Johansen uparuaavoq.
Iliuuseqartoqartariaqarpoq
- Sukannersumik iliuuseqartoqartariaqarpoq. Imaassinnaavoq atorfilittat ilaat allanik taarsertariaqartut. Inuiaqatigiinni ineriartorneq uninngatinneqarsinnaanngilaq inuit ataasiakkaat illersorniaannarlugit, Lars-Emil Johansen oqarpoq, tassani apersorneqarnermini qinersinermi tullermi qinigassanngortinniarani oqaatigaa.
Politikerimik nuimasumik apersuineq tamaat AG-mi uani sapaatip akunneraneersumi atuaruk, imaluunniit uani e-aviisitut pisiariuk