isumalioqatigiissitaq
Lars-Emil Johansenip siulittaasuuffik taamaatippaa
Tunngaviusumik Inatsimmut Isumalioqatigiissitami siulittaasussatut Lars-Emil Johansen tupaallannartumik tunuarniarluni aalajangerpoq.
Aalajangerneq ullumikkut Inatsisartuni siulittaasoqarfimmut tunniunneqarsimasoq, tusarfimmit tutsuiginartumit Sermitsiaq.AG-p paasivaa.
Kalaallit Nunaata namminersulivinnissaanut sinaakkusiisussami pingaarutilimmi kina siulittaasunngussanersoq suli aalajangerneqanngilaq.
Inatsisartuni Qinigaanerup Misilinneqarnissaanut Ataatsimiititaliaani tallimanngormat Lars-Emil Johansen Inatsisartuni siulittaasuugaluarluni Tunngaviusumik Inatsimmut Isumalioqatigiissitami siulittaasunngorsinnaasoq tallimanngormat aalajangeraluarpaa.
Atuaruk: Lars-Emilip marloqiusamik atorfeqarnissaa ataatsimiititaliap akueraa
Lars-Emil Johansenip marloqiusamik atorfeqarnissamini oqaaseqarnissamut killeqalernissani misigigamiuk tunuarneranut tunngavilersuutigineqarnerarpoq. Oqallinnermilu aamma amerlasuut utoqqaavallaarnerarlugu taamatullu inuusunnerusup Kalaallit Nunaata siunissaanut sinaakkutissat ilusilersornissaanik isumaqarnerat pisooqataasimassaaq.
Aamma atuaruk: Atorfimmut pingaarutilimmut tulluartuua?
Naak aalajangerneq tupaallannartuugaluartoq Sermitsiaq.AG-p pineqartumit oqaaseqartitsinissani iluatsissinnaanngilaa.
Taasinermik ataasiinnarmik amerlanerussuteqartut Siumumit Lars-Emil Johansen siulittaasussatut toqqarpaa. Tamanna inuillu nittartakkakkut attaveqaqatigiittarfiininannertuumik oqallinneq pissutaaqataasimanersut ilisimaneqanngilaq.
Vivian Motzfeldt siulittaasussaq nutaaq?
Lars-Emil Johansenip siulittaasutut Inatsisartunut ilaasortaq Vivian Motzfeldt unammillertigaa. Taanna Tunngaviusumik Inatsimmut Isumalioqatigiissitamut ilaasortatut Siumumit innersuunneqarnikuuvoq.
Sermitsiaq.AG-p Vivian Motzfeldt siulittaasunngornissaminut piareersimanersoq tusarniarlugu attaveqarfigissallugu iluatsinngilaa. Partii aamma siulittaasumik nutaamik taasissanersoq nalorninarpoq.
Politikkikkut oqaaseqartartoq paasitinneqanngitsoq
Siumumi politikkikkut oqaaseqartartoq, Karl-Kristian Kruse, aalajangiineq pillugu Lars-Emil Johansenimit suli paasitinneqarsimanani Sermitsiaq.AG-mut ilisimatitsivoq.
Siumumi ataatsimiinnissamut qaaqqusisoqangajalissasoq politikkikkut oqaaseqartartup naatsorsuutigaa, tassani kina siulittaasutut sassartinneqassanersoq paasineqassaaq.