Ukiunik 30-nngortorsiorneq

Lars-Emil Johansen Nunat Avannarliit Killiit Siunnersuisooqatigiivini siulittaasunngussaaq

Ullumi ataasinngornermi Kalaallit Nunaat, Island, Savalimmiut aamma Norgep poltikkikkut suleqatigiinnerat nalliuttorsiutigineqarpoq

Nunat avannarliit killiisa erfalasui

Ukioq manna nunat avannarliit killiit siunnersuisooqatigiit suleqatigiinnerisa pilersinneqarneranit ukiut 30-nngorput, siullermik Vestnordens Parlametariske Samarbejdsrådimik taaguuteqartoq, politikkikkullu katersuunnermi annertuumik nalliuttorsiutigineqassaaq.

Nunat Avannarliit Killiit Siunnersuisooqatigiivi, ullumikkut taama taaguteqartup, nalliuttorsiorneq siunnersuisooqatigiit 31-issaanik Savalimmiuni ataatsimiinneranni ulluni marlunni malunnartissavaa.

Nuannannermik aallartissaaq
Ullumikkut ataasinngornermi Runavíkip kulturip illorsuani nalunaaqutaq 21-mit 23-ip tungaanut kulturikkut pikialaartoqassaaq.

Siunnersuisooqatigiit siulittaasuat Bill Justinussen oqalugiassaaq, kingornalu illoqarfiup borgmesteria oqalugiassalluni.

Savalimmiuni nipilersoqatigiit Enekk, inuiaat nipilersuutaannut ilisarisimaneqartut, Varna Kalaallit Nunaanniit bluesimik nipilersornermut tivanermullu ilisarisimaneqartoq, aamma Eythor Ingi Islandimeersoq Eurovision 2013-imi amerlasuunit ilisarisimaneqartoq, tamarmik nipilersukkanik arlalinnik atuissapput.

Eqaarsaartartut, qitinneq erinarsornerlu
Ataasinngornermi unnukkut aamma siullerpaamik Nunat Avannarliit Killiit Siunnersuisooqatigiivini ataqqinaammik nersornaasiissapput.

Peqataasut aamma savalimmiormiunik eqaarsaartartunik takutitsisoqarnissaa qilanaarisinnaavaat.

Savalimmiut eqaarsaarnermik takutitsineq pingaartittorujussuuaat, qeqertallu 'æstetisk gymnastikkimi' VM-ertoqarnerani aaqqissuisuunikuupput.

Unnuk naggaserlugu ataatsimut erinarsortoqassaaq savalimmiormiullu qitittaasiattut qitittoqassaaq.

Aqagu marlunngornermi politikkimut tunngassuteqarnerussaaq. Arlalinnik oqalugiartoqassaaq, ilaatigut Islandip præsidentia aamma statsministeria, Naalakkersuisunilu siulittaasoq oqalugiassaaq.

Siulittaasoq nutaaq
Aammalu Ruth Heilmann Nunatsinniit siunnersuisooqatigiit piffissap ingerlaner suleqatigiinnerat oqaluttuarissavaa.

Ullormi politikkimut tunngasumi naggasiinermi, Nunat Avannarliit Killiit Siunnersuisooqatigiivini siulittaasunngortussaq, Lars-Emil Johansen (S), nalliuttorsiorneq naggaserlugu oqalugiassaaq.

Nalliuttorsiorneq nittartakkakkut Vestnordisk.is-ikkut toqqaannartumik aallakaatitsisoqassasoq siunnersuisooqatigiit neriorsuipput.

Powered by Labrador CMS