Lars-Emil: Aqagu qanoq aalajangersimanerlunga nalunaarutigissavara

Siumup partiianik pilersitseqataasoq, Lars-Emil Johansen, aviisimut AG-mut sap. ak. kingulleq oqaluttuarpoq Siumumi siulittaasussatut sassarnissani isumaliutersuutigigini. Kisianni siulittaasussarsiornissaq – Nuummi arfininngornermi pisussaq - ullormik sioqqullugu sassarniarnerluni suli nalunaaruteqarusunngilaq.

Atuaruk: Arlalinnit Lars-Emil Johansen siulittaasussatut piukkunneqarpoq

Siumup immikkoortortaqarfiisa arlallit tallimanngornermi oqaluttuaraat Lars-Emil Johansen Siumumi siulittaasussatut piukkullugu, naak suli siulittaasussatut sassarniarnerluni saqqummiussaqanngikkaluartoq.

Piukkussisut ilagaat Siumut Nuuk aamma Siumut Aasiaat, taakkua Lars-Emil Johansen siulittaasussatut sassarnissaanut kaammattorpaat, sassassappat Siumut Uummannaq piareersimasoq Lars-Emil Johansenimut taasinissaminut. Kisianni immikkoortortaqarfiit suli amerlanerit Lars-Emilip siuttuunissanut takorusuisimapput:

- Tuppalliutigivakka nuannaarutigalugillu taama amerlatigisut siulittaasunngorniarnissannut kaammattuimmata. Taakkua ilagaat Siumut Sisimiut, Siumut Nanortalik aamma Siumut Attu, Lars-Emil Johansen Sermitsiaq.AG-mut oqarpoq.

Kisianni taakkua kaammattuutaat malinniarnerlugit maannamut suli oqaatigerusunngilaa:

- Aqagu immikkut ataatsimeersuarneq aallartippat peqataasut oqaluttuutissavakka qanoq aalajangersimaninnik, Lars-Emil Johansen oqarpoq.

Atuaruk: Lars-Emil suli utaqqisitsivoq

Siumup immikkut ataatsimeersuarnissaa aqagu Katuami nalunaaqutaq qulingiluanut aallartissaaq. Lars-Emil Johansenillu, ukiut 43-t matuma siorna qinigaaqqaartup, suli politikkikkut ingerlaannarnissaminut kaammattuisorpassuit tuppalliutigai:

- Nuannaarpunga qujamasullungalu taama amerlatigisunit kaammatorneqarama, Lars-Emil Johansen oqarpoq.

Atuaruk: Politikkimut naliliisartoq: Lars-Emilip inuusuttut qimaatissinnaavai