Lagmand: Savalimmiut kissaataat inatsisilerinermit unammillerneqartoq

Savalimmiuni nunanut allanut tunngasuni akisussaaffimmik annermik tigusiniarneq imaaliallaannagassaanngilaq. Lagmandip Aksel V. Johannessenip, ministeriunermik januaarimi ataatsimeeqateqaarnermi kingorna, tamanna nassuerutigisariaqarpaa.

Politik pissutaanani, inatsisilerinerli pissutaalluni, Savalimmiut nunanut allanut tunngasunut akisussaaffimmik annertunerusumik maannakkut tigusisinnaanngikkallarpoq. Tamanna Aksel V. Johannessenip, ministeriunermik Lars Løkke Rasmussenimik, Købehnavnimi januaarip 22-ani ataatsimeeqateqareerluni inerniliussaraa.

Savalimmiut akisussaaffimmik annerusumik tigusiumalluni arlaleriarluni nalunaartareerpoq, tamannali imaaliallaannaq aaqqiivigineqarsinnaanngikkallarpoq.

- Soqutigisatta nammineq suliarinissaanut, danskit naalakkersuinikkut taperserpaat. Aamma takusinnaagamikku suliat ilaanni soqutigisagut assigiinngitsillugit aaqqiagiinngissuteqarsinnaasaratta. Savalimmiut Danmarkillu akornaniinnaanngitsoq, aammali ilaatigut Savalimmiut Kalaallit Nunaallu akornanni. Inatsisilerinerli akuliunneqaraangat imaaliallaannaq aaqqiisoqarsinnaanngilaq, taamaammat piumasarput suli angunngilarput, neriuppungali tamanna iluatsikkumaartoq, Aksel V. Johannesen oqarpoq.

Tunngaviusumik inatsit aporfiuvoq

Savalimmiut annertungaatsiartumik piginnaatinneqaeput, ilaatigut namminneerlutik killilersugaanngitsumik niueqatigiinnissamut isumaqatigiissusiorsinnaallutik aammalu nunanut allanut aalisarneq pillugu isumaqatigiissusiorsinnaallutik. Suliaqarfinnili, naalagaaffimmi nunat pingasuusut tamarmik sinniisoqartinneqarpata, naalagaaffik ataasiusoq aalajangiisuusarpoq.

Tamanna aaqqiagiinnginnermik kinguneqarsinnaasoq, Aksel V. Johannessen isumaqarpoq. Taanna oqarpoq nunat tamalaat akornanni annertunerusumik akissussaaffeqalernissamut, danskit isaannit tunngaviusumik inatsit aporfiusoq.

- Taama nassuiaateqarneq isumaqatigiissutigivinngilarput, Aksel V. Johannesen oqarpoq.

Suleqatigiissitaq unittooqqasoq

Siorna januaarimi ataatsimiinnerup kingorna lagmandi isumalluarluni oqarpoq aaqqiissutissanik suliaqartussamik suleqatigiissitamik pilersitsinissamik isumaqatigiissuteqartoqartoq. Aaqqiissutissatut siunnersuutit naalagaaffeqatigiit Savalimmiuni aasaq ataatsimiinneranni eqqartorneqassallutik.

Piffissatulli pilersaarusiaq anguneqanngitsoorpoq. Suleqatigiissitaq arlaleriarluni ataatsimiittarsimavoq, tigussaasunilli aaqqiissutissanik nassaarsimanani.

Lagmandip nassuerutigaa piffissaliussaq isumalluarpallaarluni aalajangerneqarsimasoq.

- Naatsorsuutigineqarsimagaluarpoq suliaq taama ajornakusoortigissanngitsoq. Tamanna politikeriinnarnit nalaanneqarneq ajorpoq, aammali atorfilittat taama aqqusaagaqartarput, inatsisilerineq aporfiusarmat, Aksel V. Johannesen oqarpoq.

Nunat Avannarliit Siunnersuisoqatigiivinut utaqqineq

Savalimmiut Nunat Avannarliit Siunnersuisoqatigiivinut ilaasortaanerminni namminneerlutik immikkut oqaaseqartarumapput. Savalimmmiut nunatut namminersortutut siunnersuisoqatigiinni ilaasortanngorniarsimagaluarput, anguniarnerali unitsikkallarsimallugu. Lars Løkke Rasmussenip Aksel V. Johannessenillu, Savalimmiut Nunat Avannarliit Siunnersuisoqatigiivini nunatut ilaasutut ilaasortanngornissaq siorna ataatsimiissutigaat.

Aaqqiissutissatut siunnersuut nunanut peqataasunut saqqummiunneqassaaq, akuerineqarsinnaanersoq paasiniarlugu.

Tassanili aamma aaqqiissutissamut qanillinerusoqarsimanngilaq. Aksel V. Johannesen oqarpoq nalorninarluinnartoq ukiamut ataatsimiinnissap tullianut aaqqiissummik nassaartoqareersinnaanersoq, Savalimmiunimi qinersisoqalivippoq. Savalimmiut kingusinnerpaamik aggustip 31-ani qinersissapput.

Taassuma maluginiarpaa aaqqiissutissamik nassaarniarnermi naalakkersuinikkut kajumittoqartoq, nunatulli ilaasutut ilaasortaanissaq qanoq imaqarumaarnersoq paasiuminaakkallarpoq.

- Nunatut ilaasutut ilaasortanngornissarput Nunat Avannarliit Siunnersuisoqatigiivini periarfissanik pisinnaatitaaffinnillu, ullumikkut piginngisatsinnik, imaqartariaqarpoq, lagmandi oqarpoq.

Powered by Labrador CMS