Lagmandi: Mette Frederiksenip suleqatigiinneq annertusarniarpaa

Savalimmiuni lagmandi folketingimi oktobarip aallaqqaataani ammaanersiortoqarmat pisarnertut najuuppoq. Taassuma immikkut nuannaarutigai, ministeriunerup Mette Frederiksenip Savalimmiunut Kalaallillu Nunaannut tunngatillugit oqaasii.

- Issittumut naalagaaffeqatigiinnermullu tunngatillugit inatsimmik nutartererusulluinnarnera upperaara, tassa issittumi susoqarneranik Savalimmiut Kalaallillu Nunaat pitsaanerusumik ilisimatinneqartalernissaat pissutigalugu, Bárður Nielsen oqarpoq.

Mette Frederiksenip paasisinnaalluarpaa, Savalimmiunit Kalaallillu Nunaannit nunanut allanut isumannaallisaanermullu tunngasutigut politikkeqarnermi peqataatinneqarnerunissamik kissaateqartoqarnera, aamma suleqatigiinnerup annertusarneqarnissaanik aamma ilisimasanik paasissutissanillu avitseqatigiittoqartarnissaanik kissaateqartoqarnera.

Kissaatigisatoqaq

Savalimmiuni oqartussat nunanut allanut isumannaallisaanermullu tunngasutigut politikki pineqartillugu pitsaanerusumik ilisimatinneqartarnissartik ukiuni arlalinni kissaatigisarsimavaat. Suliaq tamanna Bárður Nielsenip ingerlateqqikkusuppaa.

Savalimmiuni, pingaartumik savalimmiut eqqaanni isumannaallisaanermut tunngassuteqartunik suliaqartoqaraangat ilaatinneqartarnissaq kissaatigineqartarsimavoq.

Taassuma ilisimatitsissutigaa, Savalimmiut qanoq ilaatinneqartarsinnaanerat pillugu atorfilittat aaqqiissutissarsiorlutik suliaqarsimasut. Lagmanditulli atuunnera sivikimmat, suliaq taanna sumut killissimanersoq ilisimasaqarfiginngilaa.

Bárður Nielsenili isumaqarpoq, tamanna iluatsilluarumaartoq. Ministeriunerullu ammaanersiorluni oqalugiareerneratigut upperinninnera annikinnerulersimanngilaq.

- Tamatuma takutippaa, pitsaanerusumik annertunerusumillu ilisimatinneqartarnissarput pineqartilugu ajunngitsumik

siumukartugut, Bárður Nielsen oqarpoq.

Piaarnerpaamik aaqqiissutissarsisoqassaaq

Ammaanersiorluni oqalugiartoqareermat, Bárður Nielsen Mette Frederiksenilu sivikitsumik ataatsimeeqatigiipput. Naalagaaffeqatigiinneq nukittorsarneqassasoq, taakku marluullutik oqaatigaat.

Isumannaallisaanermut nunanullu allanut tunngasutigut pitsaanerusumik ilisimatitsissuteqartarneq naalagaaffeqatigiinnerup nukittoqqutaasa ilagivaat. Bárður Nielsenip kissaatigaa piaarnerpaamik aaqqissutissarsiortoqassasoq.

- Nunami pissutsit aallaavigalugit politikkerneq pineqarpoq. Tassa suliat pitsaasumik naammassineqartassapput, suliassarlu tamanna atorfilittanit maanna suliarineqarpoq, soorunami tamatuma piaarnerpaamik aaqqiiffigineqarnissaa takorusupparput, Bárður Nielsen oqarpoq.

Nunanut allanut tunngasutigut politikkimi kiffaanngissuseqarnerorusunneq

Savalimmiuni politikkerit ukiorpassuarni kissaatigisimasaasa ilagaat, nunanut allanut tunngatillugu inatsisip, 2005-imi atuutsinneqalersup allanngortinneqarnissaa. Tassa naalagaaffiup innuttaasunut pisussaaffii pillugit isumaqatigiissummut tunngatillugu Savalimmiut sunik pisinnaatitaanersut tassuunakkut aqqutissiuunneqartarmat.

DFG-mik aaqqissuussaq Danmarkimik, Savalimmiunik Kalaallillu Nunaannik ataqatigiissitsisuuvoq. Savalimmiut killilimmik kiffaanngissuseqarpoq, nunat tamalaat aaqqissuussaannut peqataatitaqartarnissamut nammineerlunilu nunanut tamalaanut isumaqatigiissuteqartarnissamut.

Inatsit naapertorlugu, Danmarkip ilaasortaaffigeriigaanni Savalimmiut nammineerluni peqataatitaqarsinnaanngilaq. Tassa Danmark arlaannik isummissatilluni Savalimmiut Kalaallillu Nunaat eqqarsaatigisassavai.

Bárður Nielsenip nunanut allanut tunngatillugu intsisip allanngortinneqarnissaa sulissutiginiarpaa, Danmarkip Savalimmiut soqutigisaanik isumaginnissinnaannginnera pissutigalugu, tassami soqutigisat ilaannikkut danskit kalaallillu soqutigsaannut akerliusarmata.

Lagmandiusimasup Aksel V. Johannesenip, Javnaðarflokurin, Savalimmiut kiffaanngissuseqarnerusumik iliuuseqarsinnaanerat pillugu Danmark killissinnaasimanngilaa. Bárður Nielsenili misileeqqinniarpoq.

- Soorunami Savalimmiut nunanik isumaqatiginninniarfigisanik toqqaannartumik isumaqatigiissuteqartarnissamut periarfissaqartinneqassaaq, isumaqatigiissuteqarnermilu Savalimmiut savalimmiormiullu soqutigisaat kisimik pineqartassapput, Bárður Nielsen oqarpoq.