Kuupiup ukiaru qinersisoqassangatippaa

Qinersinissamik suaaruteqannginnermi naalakkersuisoqatigiit aalisarnermut inatsit ukkatariniaraat Kuupik Kleist naliliivoq

Ukiaru aatsaat qinersisoqarnissaanut aalajangiisinnaasut arlaqarput, Naalakkersuisut siulittaasorisimasaat, Kuupik Kleist, taama naliliivoq.

Sermitsiaq taama allaaserisaqarpoq.

Tamannali piumasaqaatitaqarpoq. Naalakkersuisoqatigiit aalisarnermut inatsit inissittariaqarpaat.

– Aatsaat piffissaq kingullerpaaq atorlugu qinersinissamik nalunaaruteqartoqarnissaa arlalinnik pissuteqarsinnaavoq. Siulleq tassaavoq partiinik nutaanik marlunnik pilersitsisoqarsimanera, Nunatta qitornai, Vittus Qujaukitsumit pilersinneqartoq, aamma Samarbejdspartiet, Michael Rosingimit Tillie Martinussenimillu pilersinneqartoq, tassami piffissaq sivisunerusoq ingerlatillugu inuit partiinik nutaanik nutaarsiassaq puigoriartussavaat. Aammami tusarsaarpiarunnaassammata.

- Aammattaarli imatut pisoqakulasarpoq, suliaq annertooq naammassereerlugu qinersinissamik nalunaaruteqartoqartarluni, inuit taassuminnga eqqaamannitsillugit, tamannalu qineqqusaarnermi atorlugu, assersuutigalugu aalisarnermut inatsit akuersissutigitinnneqarsimappat.

Qinigaaffiup naammassinnginnerani qinersititsisoqanngippat, Naalakkersuisut tatigisassaanerannik aamma takutitsinerusoq, Kuupik Kleist isumaqarpoq.

Sermitsiami paasisaqarnerusinnaavutit, tassani aamma qineqqusaarnermi suut sammineqassanerannik Kuupik Kleistip isumaa atuarsinnaavat:

Powered by Labrador CMS