Kuupiup naliliinera: Angusaq ersarluttoq

Isumasiuineq kingulleq eqquutissappat periarfissat pissaganarput, politikkikkut oqaaseqartartoq Kuupik Kleist naliliivoq.

Qineqqusaarnerup aallartilaarnerani KNR-ip Sermitsiaq-llu qinersisartunut isumasiueqqaarneranni “naluara”-mik qinersisut amerlajunnaarsimanerat maluginiangassaavoq.

Partiit ilaaluunniit qineqqusaarutiminnik isertuussingaluarpata. Qinersisartunik ataatsimiisitsisarnerit nalorniunnaarnermik kinguneqarsimarpasipput. Qinersisartulli arlaqanngitsut assiliamik allannguisuusinnaapput.

Inuit Ataqatigiit Siumut naggasiilluartarnerminik ilisimaneqartoq ungasinnerulersimavaa.

Isumasiuineq kingulleq

Atassut: Ilaasortaq ataaseq

Demokraterne: Ilaasortat 6

Inuit Ataqatigiit: Ilaasortat 10

Siumut: Ilaasortat 9

Partii Naleraq: Ilaasortat 3

Partii Nunatta Qitornai: Ilaasortaq ataaseq

Suleqatigiissitsisut: Ilaasortaq ataaseq

Najoqqutaq: HS Analysep KNR-imut aamma Sermitsiamut suliaa

Demokraatit kingullermi qinersinermiik 50 procentinik amerlanerusunik ilaasortaatitaqalissaaq. Niels Thomsenip uternera siuariangaatsiarnermut pissutaalluarsinnaavoq. Partii Naleraq sukataarussilluni qineqqusaaraluarluni ilaasortaatitaminik amerleriaateqassanngilaq

Isumasiuinerit eqquutissappata Atassutip, Partii Nunatta Qitornai, Suleqatigiissitsisut ilaasortaatitassaat kisimiillutik sulissapput.

Patajaassuseq unneqqarinnerlu

Inuusuttut qinerseqqaartussallu inunnik malersuinerit pisuuteqattaannerillu tusarusunngilaat. Naalakkersuisunngortussat qineqqusaarutitik patajaatsumik unneqqarissumik piviusut piviusorsiornerlu aallaavigalugit naalakkersuisoqarnissaa, taakku kissaatigaat.

Meeqqat inuusuttullu atugaat ilinniartitaanerlu inuusuttunit inuit naapeqatigiittarfiini apeqqarissaarnernilu soqutigineqartoq allassimavoq. Partiinilu assiigiinngitsuni inuussuttut qineqqusaartut ataatsimooqatigiinnermik ataqatigiinnermillu takutitsilluarnerat aamma eqeersaataavoq.

Inuttaat

Politikkikkut suleqatigiinnermi inuttut piginnaasat allanillu suleqateqarnissaq assut pingaaruteqarpoq. Taamaammat partiini ataasiakkaani kikkut qinigaassanerat pissaganartuaannarpoq.

Partiit pingasut pingasuinnarnik ilaasortaatitaqalissappata kikkut qinigaassanersut pissaganassaaq. Inuit pingaarnerit soqutiginarnerulertarput, Vittuussava imaluunniit Aleqa, Michaeliussava imaluunniit Tillie aamma Siverthiussava imaluunniit qineqqusaartitaat alla.

Angerlarsimaffinni eqqoriaanissamut suli periarfissaqarpoq.

Periarfissaasinnaasut

Apriilip 24-ata aqaguaniit partiit inissiterissapput.

Qineqqusaarnerup aallartinneranut sanillersuussinermi partiit ilisarnarsarneqarnerisa saniatigut qineqqusaarnerup kingorna suut suleqatigiissutigineqarsinnaaneri aallartereerput.

Inuit Ataqatigiit isumasiunermi siuttunngussapput, amerlanerussusiinissamullu periarfissinneqaqqaassallutik. Partiit anginersaat marluk, 20-t missaanni ilaasortaatitaqarlutik amerlanerussuteqarlualersinnaanerat katiterinermi ajornannginnerpaavoq.

IA-li allanik aamma periarfissaqarpoq, ilaatigut Demokraatit kattunnerisigut. Siumut IA-mik suleqateqassanngikkuni ikinnerpaamik partiet allat marluk isumaqatigisariaqarpai. Kisianni IA Siumulluunniit suleqatigitinnagit naalakkersuisunngortitsisoqarsinnaanngilaq.

Isumaqatigiissutigineqartussat

Aalisarnermut inatsisissap suliarineqarnera kikkut suleqatigiinnissaannut aalajangiisuusinnaavoq. Akileraartarneq, namminiilivinnissamik sulineq, peqqinnissaqarfik, imigassamut inatsit aatsitassanut oqartussaaffik atukkanillu nalimmassaaneq aamma isumaqatiginniutigineqassapput

Annilaaganartumik pissaganassaaq. Marlunngorpat piviusorsiussaangut. Qinersineq naammassippat allat takkutissapput.

Qinersisartunik isumasiuineq qinersinissaq ullunik qulinik 12-inilluunniit sioqqullugu ingerlanneqarsimavoq. Ullumikkut ullut sisamaannanngorput.

Kuupik Kleist, ukiuni tallimani politikkikkut qaffasissumik suliaqarsimanngitsoq, politikkikkut suliaqarnermini piffissami malunnaarteqarnerpaat ilagaat. Naalakkersuinikkut suliaqarnermini IA-mi siulittaasunngornini, Naalakkersuisuni siulittaasunngornini aamma Folketingimut ilaasortanngornini iluatsissimavai. Atorfiit kingulliit marluk taakkartorneqartut IA-mi siullerpaalluni anguai. Ukiuni kingullerni politikki pillugu tusagassiuutini naliliillattaartarpoq.

Powered by Labrador CMS