Kuupik: Taamaammat siulittaasutut tunuarpunga

- Partiimi aamma Inuit Ataqatigiit Kattuffianni ukiut 30-it sinnerlugit sulereerlunga partiip siulittaasuatut tunuarnissara aalajangiuppara.

Inuit Ataqatigiit Nuummi ataatsimiittarfianni tusagassiortunut katersortitsinermi Kuupik Kleist partiimi siulittaasuujunnaarnini nalunaarutigimmagu oqarpoq.

Ukiuni qulikkaani kingullerni Inuit Ataqatigiit tapersersorneqarnerat annertuumik alliartorpoq ilaatigullu siullermeerutaasumik Folketingimi ilaasortaatitaqalerlutik, siullermeerutaasumik nunatsinni Inatsisartunut qinersinermi partiit akornanni amerlanerpaanik taaguunneqalerlutik aamma siullermeerutaasumik Naalakkersuisuni siulittaasoqartitsillutik, tassa 2009-mi juunimit 2013-imi marsip aqqaneq aappaata tungaanut.

Pisoqarnissaanut piareersimanissaq
- Ukiuni qaangiuttuni nunatsinni naalakkersuinikkut ineriartorneq annertoorujussuaq pisimavoq taamatullu aamma Inuit Ataqatigiinni. Ukiumi qaangiuttumi pisartut massakkullu nunatsinni naalakkersuinikkut pissutsit najummatsernartut eqqarsaatigalugit Inuit Ataqatigiit qanorluunniit pisoqarsinnaaneranut piareersimajuarpugut, taamaakkaluartorli ingerlariaqqinnissamut aalajangersaanissaq pisariaqarpoq. Nalornisitsinaveersaartariaqarpugut aamma partiimi ilaasortat nunaqqatittalu sinnerisa ilisimasariaqarpaat qaqugu qanorlu pisoqassanersoq. Partiitta siulersorneqarnerata isumannanngitsumik, aamma aqagu, ingerlaqqinnissaa Inuit Ataqatigiinni qularinngilarput kinguaariit tulliit akisussaaffimmik tamatuminnga tigusinissaminnut piareersimammata, Kuupik Kleist tusagassiutinut nalunaarummi oqarpoq.

Inuit Ataqatigiit-nni siulittaasup tunuarneratigut immikkut ittumik ataatsimeersuartoqassaaq. Tamanna pissaaq Nuummi maajip ulluisa 30-anni.

Allaaserineqartoq ilumuunnginnerarpaa
Danskit aviisiata Berlingske Business-ip Kuupik Kleist parteeqataalu Ove Karl Berthelsen pillugit sapaatip akunnera kingulleq allaaserisaqarpoq. Siunersuisarfik aallarteqqammersoq Group Greenland politikkikkut ikinngutertik Hans Pavia Egede peqatigalugu pilerseqqammeraat ilaatigut aviisimi atuarneqarsinnaalluni. Siunersuisarfik Group Greenland ApS GreenGems-imik taaguuteqarsimasoq Nuummi allaffeqarfeqartoq aviisi ilaatigut paasissutissiivoq.

Allaaserineqartorli ilumuunngitsoq Kuupik Kleistip radioaviisimut tallimanngormat oqaatigaa.

Kuupik Kleist Inatsisartuni ilaasortaaginnassaaq. Tulliani Inatsisartunut qinersisoqalerpat marsimi 2017-imi qinigassanngortissanerluni aalajangiusimanngilaa.

IA-p nuna tamakkerlugu ataatsimeersuarnissaata tungaanut Aqqaluaq B. Egede siulittaasuugallassaaq, ataatsimeersuarnissaq maajip 30-ani ingerlanneqassaaq.

Siulittaasussatut pisortatigoortumik suli qinigassanngortittoqanngilaq.