Kuupik suleqatigiinniarnermi ajornartorsiuteqartoqarmat tunuartoq

Kuupik V. Kleist Tunngaviusumik Inatsisissaq pillugu Isumalioqatigiissitami siulittaasutut sooq tunuarnini pillugu maanna oqaaseqarpoq. Naalakkersuisut Siulittaasuata nassueruteqarluni oqaatigaa, Tunngaviusumik Inatsisissaq pillugu Isumalioqatigiissitap sulinera pilersaarutit malillugit ingerlasimanngitsoq.

Inuit Ataqatigiinni Naalakkersuisunilu siulittaasuusimasup Tunngaviusumik Inatsisissaq pillugu Isumalioqatigiissitami qaammatit pingasut sinnilaarlugit siulittaasooreerluni siulittaasutut tunuarluni aalajangersimanera marlunngornermi saqqummiunneqarpoq.

Kuupik V. Kleistip oqaluttuaraa, isumalioqatigiissitami ilaatigut suleqatigiinniarnermik ajornartorsiuteqartoqarnera pissutigalugu tunuarsimalluni. Siulittaasuujunnaartup oqaatigaa, isumalioqatigiissitami ilaasortat arlallit suleriaasianut akerliusimasut:

- Isumalioqatigiissitami ilaasortat allat suleriaasera akerlerimmassuk tunuarniarlunga aalajangersimavunga. Namminersulivinnissamut inatsisissatut siunnersuuterpiaq uanga suliarerusussimavara, allalli suliassat allat, soorlu inatsisit allat imaluunniit sulisunut atugassarititaasut misissorneqarnissaat sulissutigerusussimavaat. Uanga tamanna allaffissornikkut suliassatut isigaara, tamannalu uanga peqataaffigerusunngilara, Kuupik Kleist Sermitsiaq.AG-mut oqarpoq.

"Isumalioqatigiissitaq kanngunartuunngilaq"

Inatsisartut isumalioqatigiissitap sulineranik unitsitsisoqarnissaanik Atassummit siunnersuut marlunngornermi aappassaaneerlugu suliarivaat. Partiit oqallittoqangaatsiareersoq Demokraatinit taperserneqarpoq.

Atassummi siulittaasup Aqqalu Jerimiassenip arlaleriarluni oqaatigaa, isumalioqatigiissitaq angusaqanngisaannarsimasoq, aamma pisortat aningaasaataat miliuunilikkaat asuli atorneqarsimasut. Kuupik V. Kleistip tamanna ilisarisinnaanngilaa, nassuiaatigaali unammilligassaqartoq aaqqiiffigineqartariaqartunik:

AAMMA ATUARUK: Partii isummaminik allannguisoq: Inatsit tunngaviusussaq pillugu Isumalioqatigiissitap atorunnaarsinneqarnissaanut taaseqataasoq

- Isumalioqatigiissitaq kanngunarnerarneqarmat pakatsivunga. Tamannami eqqortuunngilaq. Isumalioqatigiissitaq namminersulivinnissamut inatsisisssatut siunnersuummut missingiummik suliaqartussaavoq. Siunnersuut takujumaneqarsinnaavoq, isumalioqatigiissitalli isumaqatigiissutit tamarmik inissinneqarpata aatsaat suliani saqqummiuttussaavai.

Siulittaasuujunnaartup aamma isumalioqatigiissitami ilaasortat katitigaanerat suliassamullu tunngaviusoq isornartorsiorpai:

- Isumalioqatigiissitaq sunik suliaqassanersoq aallaqqaammulli erseqqissumik oqaatigineqarsimanngilaq. Politikkerit aallaqqaammulli ilaasortaatinneqarput, tamannalu uanga akerleriuaannarsimavara. Isumalioqatigiissitami ilaasortat taarseraattuarput, aamma qinersisoqarsimatillugu. Tamatumalu saniatigut ajoraluartumik isumalioqatigiissitap allattoqarfiani sulisut patajaattumik atuutinngillat. Sulisoq ataaseq sivisunerpaamik ukiumi ataatsimi sulisorineqarsimavoq, Kuupik V. Kleist oqarpoq.

Tunngaviusumik Inatsisissaq pillugu Isumalioqatigiissitaq ukiut arfinillit matuma siornatigut Naalakkersuisunit Inatsisartunillu pilersinneqarpoq. Kissaatigineqarsimalluni Kalaallit Nunaata tunngaviusumik inatsisissaanut missingiummik suliaqartoqassasoq. Isumalioqatigiissitalli qanoq suliaqarnissaa aamma sulineq politikkimut tunngassuteqassanngitsoq pillugit aallaqqaammulli ersernerlussimavoq, siulittaasuujunnaartoq isumaqarpoq.

- Naalakkersuisut Inatsisartullu kissaataa malillugit aamma innuttaasut tusarniarneqarnissaat siunertaralugu isumalioqatigiissitaq pilersinneqarsimavoq. Isumalioqatigiissitap qaqagu qanorlu namminersulivittoqarsinnaaneranik misissuinissaq suliassarinngilaa, inatsisissatulli siunnersuummut missingersuusiornissaq suliassaralugu, Kuupik V. Kleist nassuiaavoq.

Múte nassueruteqartoq

Isumalioqatigiissitaq pillugu oqallittoqangaatsiareersoq, ilaatigut isumalioqatigiissitami unammillernartoqarneranik Múte B. Egedemut nalunaaruteqartoqareersoq, Múte B. Egedep tusagassiorfitsigut nalunaaruteqarluni pisoq kipiluttunarnerarlugu nassueruteqarpoq:

- Pisoq kipiluttunarpoq. Inatsit tunngaviusussaq pillugu Isumalioqatigiissitat sulinerat malinnaaffigaarput, nassuerutigisariaqarparpullu sulinerata ingerlanera pilersaarut malillugu ingerlasimanngimmat, Naalakkersuisut siulittaasuat Múte Bourup Egede oqarpoq, naggasiilunilu oqaatigalugu:

- Isumalioqatigiissitat ingerlariaqqinnissaat pillugu aaqqiissutaasinnaasut pillugit partiit tamarmik qanimut oqaloqatigineqarput. Naalakkersuisut Inatsisartut aalajangigaat malillugu sulivugut, allaanerusumillu isummertoqassappat Inatsisartut taakkuupput aalajangiisussat, Naalakkersuisut Siulittaasuat naggasiivoq.

Kuupik V. Kleist qaammatit pingasut sinnilaarlugit siulittaasuuvoq. 2022-mi januaarip aappaani siulittaasunngorpoq, Siumumeersoq Ineqi Kielsen ullumikkut siulittaasumut tulliusoq taarserlugu. Tunngaviusumik Inatsisissaq pillugu Isumalioqatigiissitami siulittaasussaq Inatsisartuni partiit annersaannik toqqarneqartarpoq.

Powered by Labrador CMS