misissuineq
Kuupik Kleistip misissuinerup inernera akuerinngilaa
Kukkunersiuisut misissuinerisa takutippaat Kuupik Kleist, Naalakkersuisuisuni arfineq marlunni nunatta karsianut akiitsoqarsimasuni, kisiartaalluni suli 20.288 koruuninik akiligassaqartoq. Pineqartup misissuinerup inernera akuerinngilaa
Kukkunersiuisut Deloittemeersut Naalakkersuisuini ilaasortaasimasut 2009-miit 2014-imut nunatta karsianik atuisarsimanerannik misissuinerani erserpoq ilaasortaasimasut arfineq marluk nunatta karsianik inuttut nammineq Naalakkersuisuni ilaasortaanerminni atuisarsimasut.
Kisianni tamangajalluinnarmik nunatta karsianut akiitsorilersimasaminnik akiliisimapput, taamaallaat Naalakkersuisut siulittaasorisimasaat nunanullu allanut tunngasunut naalakkersuisuusimasoq, Inuit Ataqatigiinnersoq Kuupik Kleist suli akiligassaqarpoq.
Takussutissaq: Kikkut akiitsoqarsimanersut takukkit
Atuaruk: Aajuna kukkunersiuisut nalunaarusiaat
Kuupik Kleist kisimi akiliinngitsutuaalerpoq
Kukkunersiuinermimmi suliaqartut Deloittemeersut misissuinerannit takuneqarsinnaavoq Kuupik Kleist minillugu, Aleqa Hammond, Ane Hansen, Anthon Frederiksen, Mimi Karlsen, Ove Karl Berthelsen aamma Steen Lynge nunatta karsianut akiligassarilersimasaminnut akiliisimasut.
- Akuerinngilara taamatut akiittoqarneralunga kukkunersiuisut inerniliinerat. Taassuma saniatigut allanik oqaaseqarnianngikkallarpunga, Kuupik Kleist Sermitsiaq.AG-mut taama oqarpoq.
Takussutissiaq: Nunatta karsianit 25.034 koruunit Kuupimit ima atorneqarput
Akiligassat 2011-miit 2012-imut pilerput
Sermitsiaq.AG-ip, allagaatinik takunnissinnaanermut qinnuteqareerluni, siusinnerusukkut saqqummiutereernikuuaa Kuupik Kleistip aamma nunatta karsia bilitsinut januaari 2013-imi akiliisissimagaa.
Taamani Naalakkersuisut siulittaasuata naalakkersuisoqarfianit Sermitsiaq.AG-mut uppernarsarneqarpoq akiitsorilerneqarsimasut taakkua 25.034 koruunit ukioq manna septembarip naanerani akilerneqarsimasut.
Kisianni maanna Deloittep misissuinerata saqqummiunneqarnerani erserpoq Kuupik Kleist suli Namminersorlutik Oqartussanut 20.288 koruuninik akiligassaqartoq. Akiligassat, misissuinerup inernerata takutitai naapertorlugit, 2011-miit 2012-imut pinngorsimasut.
Atuaruk: Ataatsimiisitaliaq: Bankboksi ammarneqarpoq
Deloittep piffissami 2009-imiit 2014-imut Naalakkersuisunut ilaasortat Namminersorlutik Oqartussanut akiligassaannik misissuinera pdf-nngorlugu allaaserisap talerpiatungaani takusinnaavat