Kuummiuni aalisakkerivik matoqqagallartinneqartoq
Innaallagiamik qamittooqqanerup tunumi aalisakkanut tunitsivituaq sapaatip akunnera maanna matoqqatippaa. Aalisartut annertuumik eqqorneqarput. Maanna Arctic Prime Fisheries aaqqiiniarluni ujartuileruttorpoq.
Arctic Prime Fisheries Kuummiuni qaleralinnik saarullinnillu tunitsiviusarpoq. Tunitsivik innaallagiaqannginnera pissutaalluni maanna fabrikki matoqqatinneqarpoq.
- Fabrikkimut innaallagiamik pilersuiffik ajornartorsiortitsivoq. Maanna aaqqiissutissanik ujartuileruttorpugut, Arctic Prime Fisheriesimi pisortaq, Hentzar Petersen Sermitsiaq.AG-imut oqarpoq.
Suliffeqarfiup tunitsivimmik 2016-imi ammaasup qaqugu tunitsiviup ammaqqinnissaa suli ilisimanngilaa.
- Sarfaqalerpat ingerlaannaq ammarumaarparput. Qaqugorpiaq ammarnissaa oqaatigisinnaanngilara, Hentzar Petersen oqarpoq.
Aalisartunut annertuumik kinguneqarpoq
Tunumi tunitsiviup matoqqanera annertuumik aalisartunut kinguneqarpoq.
- Isertitaqanngilagut, tamannalu sakkortuvoq apersortittussammi amerlapput. Eqqorneqaqaagut. Tunitsivissaqanngilagut, taamaalillutalu isertitaqarnata. Fabrikki qaqugu ammaqqinneqarnissaa apeqqutigiartoraluarpara, kisianni oqaramik qulakkiigassat tamaasa qulakkeeqaarlugit aatsaat ammarumaartoq, Kuummiuni aalisartut piniartullu peqatigiiffiani siulittaasoq, Mikkel Nakinge oqarpoq.
Naalakkersuisut aalisakkerivimmut nutaanik innaallagissamut kabelilersuinissamut 1 millionit koruuninik 2020-mi aningaasaliissuteqarput.
Tunumi sinerissap qanittuani aalisartut pitsaanerusumik atugassaqartinneqalernissaanut Nukissiuteqarnermut Naalakkersuisuusimasip Steen Lyngep tunumi aningaasaliissuteqarpoq.