Kuultisiortoq nutaanik anguniagaqalersoq
AEX Gold ujaasiffissanut nutaanut aningaasaliisussarsiorlunilu Nalunami piiaaffimmi immikkoortiterivimmik pilersitsinialerpoq.
Canadamiut ingerlatsiviat AEX Gold, Nalunami piiaanissamut akuersissutaatilik Nanortallillu eqqaani ujaaasinissamut arlalinnik akuersissutaatilik, ujaasiffissanik nutaanik ujarlilerpoq. Tamanna erserpoq aatsitassarsioqatigiiffiup apriilip 2-ani tusagassiorfinnut nalunaarutaani. Tassani atuarneqarsinnaavoq aatsitassarsioqatigiiffi aatsitassaqarfinnik nutaanik ujaasinissamut aningaasanik amerlanerusunik pissarsiortoq. Aatsitassarsioqatigiiffik nalunaareernikuuvoq 263.000 oz-imik annertutigisumik kulteqarfimmik, annertoorujussuarmik akulimmik, nassaarsimalluni.
Aviisi Sermitsiaq taama allappoq.
- Piiaaffiup ukiuni qulini tunisassiarisimasaatut annertutigingajattumik annertussuseqarpoq, ujarassiooq aatsitassarsiornermillu immikkut ilisimasalik Ole Christiansen oqarpoq, taassumalu tupigusuutigaa sooq AEX Gold peqarfinnik nutaanik ujarlernialernersoq, piiagassat pioreersut samminiarnagit.
AEX Goldip pilersaarutigisimagaluarpaa ukioq manna akuersissuteqarfimminukassalluni, maannali ilimanarpoq aappaagumut utaqqisariaqartut.
– Neriuutigaarput piffissaq aalajangiunneqarsimasoq malillugu piiaaffik aallarteqqissinnaassallutigu. Nassuerutigisariaqarparpulli qularnanngitsumik ukioq manna ingerlatsinerput allanngortinneqassasoq, pissutsit maanna atuuttut pissutigalugit. Pissutsit qanimut malinnaavigaavut. Soorunami samminiakkatta pingaarnersaraat sulisutta Kalaallit Nunaannilu inuiaqatigiit isumannaatsuunissaat, pisortaq Eldur Olafsson Sermitsiamut oqarpoq.
Pilersaarutit malillugit AEX Gold 2021-imi immikkoortiterivimmik pilersitsissaaq.
Aviisi Sermitsiaq saqqummeqqammersoq atuaruk - uani pissarsiarisinnaavat: