Kuultisiorfimmik ingerlatsisut misissueqqilersut
AEX Gold oqartussanit akuerineqarsimavoq, sulisuminik Kalaallit Nunaannukartitseqqinnissamut, Nalunamilu misissuinerminik aallartitseqqinnissamut.
AEX Goldip kuultisiorfimmi Nalunami suliaqarnini qanittukkut nangissinnaanngorpaa.
AEX Goldip tusagassiorfinnut nalunaaruteqarnermi ilisimatitsissutigaa, Namminersorlutik Oqartussat akuersissutigisimagaat, ingerlatseqatigiiffiup sulisuminik Kujataanukartitseqqinnissamut pilersaarusiorsinnaanera.
Pilersaarummi coronap tuniluutilinnginnissaanut piumasaqaatinut naammassinnissimavoq.
Ingerlatseqatigiiffiup taamaammat misissuilluni suliaqaqqilernissani sulissutigaa:
- Sulisutta tikilluaqqunissaannut, Nalunallu inerisarneqarneranik aallartitseqqilluni misissuisoqaqqilernissaanut qilanaarpugut.
- Najukkami innuttaasut sulisullu illersorniarlugit malittarisassat atuuttut tamarmik malinneqarnissaat qulakkeerniarlugu, Kalaallit Nunaanni naalakkersuisut qanimut suli suleqatigaavut, AEX Goldimi pisortaq Eldur Olafsson oqarpoq.
Coronap atuunnera Kalaallit Nunaannit aatsitassarsiorniartunut eqquisimaqaaq. Pingaartumik nunamut nunamiillu angalaniarnerup unitsinneqarsimanera pissutigalugu, suliassallu eqqarsaatigalugit sulisut atortussallu avataaneersut pinngitsoorneqarsinnaasimanatik.
AEX Goldimit naatsorsuutigineqarpoq, juulip qaammataata naanerani sulisunik Kujataanukartitsisoqarnissaa.