Kuultisiorfik Nalunaq aappaagu ammarneqassaaq
AEX Gold Inc.-ip aktiatigut nutaamik isertitaqarnermi kingorna Nanortallip eqqaani Napasorsuup Qooruani kuultisiorfik Nalunaq aammaqqissinnaalerpaa, ukioq manna misiliummik tunisassiussalluni. Greenland Venture siulersuisuni ilaasortaatitaqalerpoq
Greenland Venture aamma Vækstfonden kuultisiorfimmi Nalunami aktianik katillugit 15 millioner koruuninut pisipput. Tamanna pivoq Canadamiut ingerlatseqatigiiffiata AEX Gold Inc.-ip, ingerlatseqatigiiffimmik Nalunaq A/S-imik, Nanortallip eqqaani kuultimik piiaanissamut piginnaatitaaffilimmik piginnittup, aningaasaatinik amerlisitsineranut atatillugu.
Aviisi Sermitsiaq taama allaaserisaqarpoq.
Aningaasat isertitat nutaat atorneqassapput piiaaffiup sapinngisamik sukkanerpaamik tunisassiulernissaata piareersarneranut, AEX Gold Inc.-imi CEO Eldur Olafsson paasissutissiivoq, taannalu Nalunami kuultisiorfimmi sulianut pisortaavoq.
Alloriarneq pingaarutilik
– Suleqatigilikkat nutaat piaaffimmi tunisassiulivinnissamut pingaarutilimmik alloriartitsipput. Maanna piiakkanik suliarinniffik nutartissavarput piiaaffillu misissorlutigu. Tamatuma saniatigut nunap sananeqaataanik misissuinerit pingaarnerusumik ingerlatissavagut, imaassinnaavorlu qillerinerit amerlanerusut ingerlakkumaarivut, Eldur Olafsson oqarpoq.
– Naatsorsuutigaarput novembarimi suliniummut akuersissuteqavinnissamut ataatsimut misissugassat, kiisalu teknikkikkut avatangiisitigullu misissuinerit naammassereersimassallutigit. Suli pilersaarutigaarput namminersorlutik oqartussanut isumaqatigiissut naapertorlugu aappaagu tunisassiulissalluta.
– Qularnanngilarli ukioq manna misiliummik tunisassiorneq annikitsumik ingerlateriissagipput, Olafsson paasissutissiivoq.
Eldur Olafsson oqaluttuarpoq decembarip tungaanut inuit 20-t missaannittut piiaaffimmi sulisut. Ukiuunerani sulinerup ingerlatiinnarneqarsinnaaneranut ilaatigut apeqqutaapput paasisat tamassunga tungaanut angumerineqarsimasut.
Allaaserisaq tamaat Sermitsiami atuaruk – uani ataani aviisimut isissutissarsigit: