Kuultisiorfik Kalaallit Nunaannit millioninik arlalinnik aningaasaliiffigineqartoq
Greenland Venture, Vækstfonden SISA-lu Kujataani kuultisiorfimmut Nalunamut 8,25 millioner koruuninik aningaasaliissuteqarniarlutik aalajangersimapput.
Nutamik aningaasaliissuteqartoqarneratigut, Kalaallit Nunaanni soqutigisaqaqatigiit kuultisiorfimmut ukiuni arlalinni misissuisoqareerluni aallartinnissamut piariingajalersumut katillugit 41 millioner koruunit sinnerlugit maannamut aningaasaliissuteqarsimalerput.
– Suliniutip piviusunngortinneqarnissaa qanillilluinnarmat aningaasaliissutitta amerlineqarnerat pissusissamisoorpoq, Greenland Venturemi Senior Investement Manager Per Buhl Olsen suleqatigisat pingasut sinnerlugit oqarpoq:
Aningaasaliissutit imminnut akilertut
– AEX-imut aningaasaliissuteqarnerup takutereerpaa, aningaasaliissuteqarnivut imminnut akilersimasut, AEX-imimi piginneqataassutit nalingi qaffassimammat, taanna oqaluttuarpoq. Ukiup ataatsip matuma siornatigut piginneqataassut ataaseq Canadami 40 cent inulaarlugu naleqarsimavoq. Taamanerniilli nalinga qaffakkiartulersimavoq, maannalu Canadami dollarip ataatsip nalinga qanilliartorpaa.
– Nalingata qaffakkiartornera arlalinnik pissuteqarpoq, Per Buhl Olsen oqarpoq:
- Suliniut pimoorussatut tunngavilersorluakkatullu isigineqarpoq, peqatigitillugulu nunarsuarmi aningaasaqrnerup arlalitsigut qularnarsiartornerani kuultit piumaneqarneruleriartorlutik. Tamanna uagutsinnut iluaqutaasussaavoq.
Londonimi ullumikkut nalunaarsorneqassasoq
AEX Gold, kuultisiorfiup pisortatigoortumik taaguutaa, Torontomi TSX-V børsimi nalunaarsugaavoq, ingerlatseqatigiiffillu ullumi Londonimi AIM-imi nalunaarsorneqassalluni. Taanna suliffeqarfinnut mikinerusunut akunnattumillu angissusilinnut ineriartortunut børsiuvoq.