Kuultisiorfik isumalluarfigineqartorujussuusoq

Kuulti nunatsinni Kujataani Nalunami kuultisiorfimmeersoq ukioq ataaseq qaangiuppat umiarsuarnik avammut assartorneqaqqilissaaq. Ingerlatseqatigiiffik AEX Gold, Arctic Miningip kingorna piginnittunngortoq, tamaani qillerinerminik naammassinningajalerpoq. Maannamut paasisat ingerlatseqatigiiffiup ilimagisaanit annertunerusut, pisortaq oqarpoq.

Kuultimik Nalunameersumik aappaagumiit avammut assartueqqilernissaq suli pilersaarutaavoq.

Nalunami ilimagisamit kuulteqarnerunera misissuinernit nutaanit ilimanarsisinneqartoq, Canadamiut ingerlatseqatigiiffiat AEX Gold, Nalunaq A/S-imik piginnittoq, allappoq. Ingerlatseqatigiiffiup kuultimik 2021-mi tunisassiulernissani suli pilersaarutigaa.

Aviisi Sermitsiaq taama allappoq.

Ingerlatseqatigiiffik isumalluutit sumiinnerat qanoq annertutiginerat paasilluarsinnaanerujumallugu ukiuni kingullerni sisamani tamaani qillerinernik arlalissuarnik ingerlataqarsimavoq.

– 2019-imi qillerinissamik pilersarutitsinni Napasorsuup Qooruani kuulteqarfiup pingaarnerup ingerlariaqqiffianik uppernarsaanissaq anguniagaasimavoq. Qillerinernit paasisavut ilimagisatsinnit annertunerupput pingaartumillu sumiiffik 0,87 meterinik silissusilik tonsimut ataatsimut 46,1 gramminik kuultitaqartoq uppernarsineqarsimalluni. Tamatumani takutinneqarpoq, nunap sannaa aatsitassartalik maannamut piiaaffiusimasunit ungasinnerusoq tikillugu takuneqarsinnaasoq. Paasisat tamakkua Nalunami siunissami siuariartortitsinissamut qiimmaallannartorujussuupput Kalaallit Nunaannilu periuserisatta ajunngitsuuneranut uppernarsaataallutik. Paasisat isumalluarnartut suliffeqarfitta siuariartornissamut periarfissaqarneranik takutitseqataapput, AEX Goldip pisortaa, Eldur Olafsson, tusagassiuutitigut nalunaarummi paasissutissiivoq.

Aviisimi Sermitsiami, uani pissarsiarisinnaasanni, atuarnerusinnaavutit:

Powered by Labrador CMS