Kuultisiorfik immikkut millioninik aningaasaliiffigineqartoq
Greenland Venturep aamma Vækstfondenip Kujataani Nalunap ammaqqinneqarnissaanut aningaasaliissutitik 15 millioner koruuniniit 33 millioner koruuninut qaffassimavaat.
Vækstfonden aamma Greenland Venture siorna juulip qaammataani aatsitassarsiorfimmut AEX Goldimut 15 millioner koruuninik aningaasaliissuteqarput. Ingerlatseqatigiiffiup Nanortaliup eqqaani Napasorsuup Qooruani kultisiorfik ammaqqinniarpaa. Kalaallit Nunaanni ingerlatseqatigiiffik Nalunaq A/S piiaanissamut akuersissutaatilik aqqutigalugu tamanna pissaaq.
Kuultisiofik 204-miit 2013-imut marloriarluni kuultinik 11 tonsit sinnerlugit annertussusilinnik tunisassiorsimavoq, ukiunili arlalini aningaasatigut ajornartorsiuteqareerluni, ilaatigut kuultinut akigititat appariartornerannit pissuteqartumik matuneqartariaqarsimalluni.
Kalaallit Nunaannut attaveqarnerusalersimaneq
Nalunaq A/S-ip siulersuisuini siulittaasup Eldur Olafssonip nuannaarutigaa, suliffeqarfiup suliniutigisimasaatigut suliniummut aningaasaliissutinik qaffaasimanerup kinguneqarluarnera.
-Maanna aningaasaliissuteqartartutta annertunerusunik piginneqataalersinnaanerat ammaassimavarput, nuannaarutigeqaarpullu Vækstfondenimit aamma Greenland Venturemit tapersersorneqarnerput, taanna oqarpoq.
Vækstfonden aamma Greenland Venture
2019-mi martsip qaammataani danskit naalagaaffiat Namminersorlutillu Oqartussat inuussutissarsiutitigut suleqatigiinnermik nukittorsaanissamut 220 millioner koruunit nalingannut isumaqatigiissuteqarput. 220 millioner koruunit taakku, naalagaaffiup 1998 millioner koruuninik Namminersorlutillu Oqartussat 22 millioner koruuninik aningaasaliissuteqarnerisigut pissarsiarineqarput, 100 millioner koruunit siunertamut atugassanngorlugit Vækstfondenimut tunniunneqarput, 100 millioner koruunillu Greenland Venturemut tunniunneqarlutik; suliap piareersarnissaanut immikkoortitanut 10 millioner koruuninik agguaasoqarluni.
-Suliffeaqarfinnit taakkunanit marlunnit tapersersorneqarneq isumaqaqaaq. Kalaallit Nunaannut Danmarkimullu toqqaannarnerusumik atassuteqarsinnaanngorpugut. Tassa iluatsitsigaangatta nunat taakku marluk aamma iluatsitsisarput, Eldur Olafsson oqarpoq.
Anguniakkap anguneqarnissaanut isumalluarneq
Suliniummut aningaasaliisinnaasunik suli amigaateqartoqarpoq, Per Buhl Olsenili Greenland Venturemi investment manageriusoq isumaqarpoq, 18 millioner koruunit taakku ajunngitsumik alloriarnermut atorneqartut, aamma Vækstfondenip Greenland Venturellu aningaasaliissutimminnik qaffaanera inuit aningaasaatilissuit allat pilerisulersissinnaagai.
- Aningaasaliissuteqartarnivut aningaasaliissuteqartartunut allanut kajumissuseqalersitsisarput. Takusinnaasatsitut aningaasaativut pisariaqartinneqartut ilaannarivaat, nunanili tamalaani aningaasaliissut4eqartartunut kajumissaatigut misinnartarlutik, taanna oqarpoq.
Nalunaq A/S-imi siulersuisut siulittaasuat aningaasaliissutinut kingullernut tunngatillugit isumalluarpoq, naatsorsuutigaalu 2021-p naanerani kuultisiorfik ammarneqarumaartoq.
Vækstfonden aamma Greenland Venture kingullermik aningaasaliissuteqaramik marluullutik 20 procet sinnilaarlugit piginneqataalerput.