Kuultinik saffiooq: Najukkami pinnersaasiortut kuultissaqartariaqarput
Nicolai Appel aatsitassarsiorfimmi Nalunaq-mi piginnittut kuultimik medaljeliuuppai. Suliffeqarfiullu Kalaallit Nunaanni pinnersaasiortut kuultissaqartinnissaannik eqqaamanninnissaannik kaammattorlugit.
Nicolai Appelip sanaluttarfiani plastikkimik skåleeqqani marlunni annikitsunnguamik kuulteqarpoq. Kuultit taakku Nalunaq ammagallarmalli tiguneqarsimasut amiakkorai. Pulaarnerata nalaani Nalunaq-minngaanniit kuulti pissarsiani kingulleq pinnersaasiaralugu suliarilerpaa.
Kalaallit Nunaanniilli kuultinik piiakkanik suli suliaqarusuppoq, taamaattumillu Nalunaq-mik piginnittoq nutaaq, AEX Goldimi pisortaq Eldur Olafsson attaveqarfigaa.
- Eldur Olaffson pissarsiariniarsimavara paaserusukkakku kalaallit kuultiutaat pillugu aalajangiinissami kikkut pingaarnertut inissisimanersut, aammalu paaserusukkakku kuulti qaqugu piiarneqalissanersoq, Nicolai Appel oqaluttuarpoq.
Medaljon takussutissatut
Kuultimi pinnersaasiassaannartut atorniarlugu qulakkeerinninniarsarinngilaq.
- Kuultimik piiaasoqartussanngornera, Kalaallit Nunaanni pinnersaasiornissamut pingaaruteqartorujussuartut neriunaateqarpoq.
Nicolai Appel ukiuni arlalinni kingullerni kalaallit kuultiinik suliaqartareerpoq, nalunnginnamiuk immikkuullarissumik oqaluttuassartaqartoq aammalu nalorninartut tunngavigalugit piiarneqanngitsoq. Suliaani pingaarnerit ilagaat Dronning Margrethep dronninginngorneranit ukiut 40-nngortorsiorneranut atatillugu kuultimit niaqorutaasaliaa, Namminersorlutik Oqartussat Dronning Margrethemut tunniussaa.
- Eldur Olafsson oqaloqatigilluarpara, kalaallit kuultiinit suliannik takutitsillunga.
- Kalaallit kuultiannit medalje siulleq suliarissavarput, taamaattummi aningaasaannarnik taaneqarsinnaanngillat. One ouncemik medaljemik sanarusuppoq, tassa kuulti 31 grammit missaat atorneqassaaq. Taanna titartarpara, naasortaqarpoq kalaallit naasuinut assersuunneqarsinnaasunik.
DI-p Kalaallit Nunaat pillugu ataatsimeersuartitsinerani Eldur Olafsson oqaluttuarpoq suliffeqarfiup Nalunaq-minngaanniit kuulti kuultitut “minguitsutut” nittarsaanniaraa. Tassa kuulti inuiaqatigiinnut avatangiisinullu tunngatillugu akisussaassuseqartumik piiarneqarsimasoq. Kuultimit medaljeliap tamanna takutinniassavaa.
Kuulti kalaallit suliaqarnissaannut
Suliffeqarfiullu inuiaqatigiinnut eqqaamanninnera atorlugu Nicolai Appel eqqaasitsiniaavoq.
- Isumaqarpunga kuulti piiarneqartoq Kalaallit Nunaanni pisiarineqarsinnaajuaannartariaqartoq, tassa kalaallit pinnersaasiortut kuultissaqartikkumallugit, oqarpoq.
Nammineerluni Nuummi kalaallinit pinnersaasianik nioqquteqalernissaq anguniarlugu allarnisaaqataassaaq. Kalaallit rubiniutaannit tunngaveqassaaq, siullermillu sølvimit suliarineqassallutik.
- Kalaallit rubiniannit sølvimillu pinnersaasiorsinnaaneq kalaallit suliarisinnaalerpassuk, taava aamma kuultimit pinnersaasiornissamut piareertoqassaaq.
Kuultinit pinnersaasiat akigissaarnerupput
Taanna isumaqarpoq Nalunaq ammarneqaqqaarmat kuulti najugaqartut pinnersaasiassaattut qulakkeerneqarsimannginnera kukkunerusoq, taamaalillunimi kalaallit pinnersaasiortartut najukkaminni nioqqutissaliornissamut periarfissaqartinneqanngillat.
- Maanna kuultimik Kalaallit Nunaanneersumik nunguutsivugut, aali tonserpaalussuit piiarneqarsimagaluartut. Kalaallillu kuultimik pinnersaasiorsinnaanerannut periarfissaliisoqarsimannginnerani iluanaarutissarpassuit annaaneqarput, oqarpoq.
Kuultinik saffiooq isumaqarpoq Kalaallit Nunaannit kuultit kalaallinit suliarineqarpata tamanna iluanaaruteqarnarnerpaassasoq. Taamaammat isumaqarpoq AEX Goldip najugaqavissunut kuultinik immikkoortitsisinnaanera niuernikkut isumassarsiatsialaassasoq.
- Kuulti kalaallinit pinnersaasiarineqarsinnaappat tamanna iluanaaruteqarfiunerussasoq isumaqarpunga, pinnersaasiarmi namminermini naleqarneruleriissammat.
AEX Goldip naatsorsuutigaa Nalunaq-mi 2021-imi piiaalernissani.