Skip to main content

Kunngissaq Nunatsinnukassaaq

Kunngikkormiutut ataqqinassusilik Kunngissaq Aarhus Universitetimeersut ilagalugit Nunatsinnukassaaq

Ataasinngorpat juunip 24-anni qallunaat/kalaallit aallartitaat amerlanngitsut Avannaanut aallassapput, tassani Aarhus Universitetip ilisimatusarfii nutaat, Zackenbergip, Daneborgip aamma Station Nordip eqqaaniittut atoqqaarfissioriartorlugit aallartikkuartorlugillu.
Taamatut tusagassiorfinnut nalunaarutikkut allappoq Aarhus Universiteti.
Aallartitanut ilaassapput Kunngikkormiutut ataqqinassusilik Kunngissaq, ilisimatusarnermut, nutaaliornermut ilinniagaqarfinnullu qaffasinnerusunut ministeri Morten Østergaard, Ilinniartitaanermut, Ilisimatusarnermut Nunanullu Avannarlernut Tunngasunut Naalakkersuisoq Nick Nielsen, Aage V. Jensens Naturfond-imi siulersuisuni siulittaasoq Leif Skov, VILLUM FONDEN-imi siulersuisuni siulittaasoq Lars Erik Kann-Rasmussen, Aarhus Universitetip issittumi ilisimatusarfittaavata (Arctic Research Center-ip) pisortaa, professor Søren Rysgaard aamma Aarhus Universitetip rektoria Lauritz B. Holm-Nielsen, taannalu oqarpoq:
– Aage V. Jensens Fonde-mit VILLUM FONDEN-imillu aningaasaliissutit angisuut pissutigalugit Tunup avannaani ilisimatusarfimmik nutaamik nutaaliaasumillu pilersitsisoqarsinnaalersimavoq. Tassani ilisimatuut periarfissarissaartorujussuussapput nunarsuarmi silap pissusiata sunniutaanut pissutsinik nutaanik paasiniaanissaminnut aammalu silap pissusiata allanngoriartornera issittumi nunarujussuarmi uumassuseqarnermut, kemi-mut fysik-imullu qanoq sunniuteqarnersoq. Aarhus Universitetimi ilisimatuut kisimik ilisimatusarfiit iluaqutigissanngilaat, nunarsuarmili tamarmi suleqaterpassuatta iluaqutigisinnaallugit.
Zackenbergimi/Daneborgimi aallartitaat ilisimatusarfiit nutaat atoqqaarfissiussavaat, taakkulu aningaasaliiffigineqarsimapput Aage V. Jensens Fonde-mit. Tassani Kunngissap illu ammassavaa siulersuisunilu siulittaasup Leif Skovip illu Namminersorlutik Oqartussanut tunniutissavaa ilisimatusarnerullu ingerlannera Aarhus Universitetimut tunniutissallugu. Zackenbergimi Daneborgimilu ilisimatusarnerni sallersaatillugu sammineqassaaq silap pissusiata allanngoriartornera Tunup avannaani imaanut aammalu naasoqarneranut uumasoqarneranullu qanoq sunniuteqarnersoq.
– Aage V. Jensens Fonde-p ukiorpassuarni siumut isigisumik suliniutit tapersersorusuttarsimavai, nalinginnaasumik issittumut, pingaartumillu Kalaallit Nunaannut iluaqutaasussat. Taamaasilluni ersarissumik ataqatigiittoqarpoq Tunup sineriaani ilisimatusarfiit Nuummilu Pinngortitaleriffiup akornanni, tassani ilisimasat katersornerisigut Kalaallit Nunaat piukkussarneqarluni silap pissusiata allanngoriartornerata kingunerisaanik unammilligassarujussuit iliuuseqarfiginissaannut, Aage V. Jensens Naturfonde-mi siulersuisut siulittaasuat Leif Skov oqarpoq.
Angalanermi kingulliullugu orninneqassaaq Station Nord, tassani Kunngissap, VILLUM FONDEN-imi siulersuisuni siulittaasup Lars Erik Kann-Rasmussenip aamma ministerit marluk Morten Østergaardip Nick Nielsenillu nunarsuarmi ilisimatusarfiit ataavartut avannarlersassaanni nivaattamik assaariarnerit siulliit ingerlatissallugit. Station Nordimi ilisimatusarfigineqassaaq silap pissusiata allanngoriartornera issittumi silaannarmut, imaanut, uumassuseqarnermut nunallu sananeqaataanut qanoq sunniuteqarnersoq. Station Nordimi ilisimatusarfik nutaaq 2014-imi naammassineqartussatut naatsorsuutigineqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER