nunat allat
Kunngissaq akerleriissutaasumi Saudi Arabiamut angalaqataavoq
Sapaatiummat Kunngissaq Frederik nulialu Mary arabiami naalagaaffimmut uuliaqarfimmut Saudi Arabiamut tikipput
Kunngissaq Frederik nulialu Mary, nunanut allanut tunngasunut ministeri Kristian Jensen (V) peqatigalugu Saudi Arabiamut angalapput.
Pisortatigoortumik tikeraarnermi, ullumi sapaammi aallartittumi, siunertaavoq Saudi Arabiami inuussutissarsiornikkut siuarsaanermik taaneqartoq, tamatumuunakkut nunamut uuliaatilissuarmut tunisartakkat suli amerlisarniarlugit.
Politikkikkut akerleriissutaasoq
Tikeraarnerli ilaatigut Folketingimi partiinit arlalinnit aamma Amnesty Internationalimit isornartorsiorneqartorujussuusimavoq, pissutigalugu Saudi Arabiap naalakkersuisunik isornartorsiuisartunik pillaajuartarmat akuttunngitsumik toqutassanngortitsisarluni.
Nunanut allanut tunngasunut ministeri naapertorlugu niuernikkut siuarsaaniarluni angalanermi kunngikkormiut peqataanerat takussutissiinerinnaanngitsoq.
– Saudiamiunik ataatsimeeqateqarnissatsinnik kunngikkormiut ikiorpaatigut, tamanna pisariaqartikkatsigu qallunaat ingerlatsiviisa tuniniaavimmut isernissaannut. Peqataanerisigut matut ammanerulissapput, Kristian Jensen oqarpoq.
Sorpassuit isumaqatigiinngissutaapput
Nunanut allanut tunngasunut ministeriup Kristian Jensenip inuit pisinnaatitaaffiinik innarliisarnerit Saudi Arabiap nunanut allanut tunngasunut ministerianik Adel al-Jubeir-imik oqaloqatigiissutigai.
– Qularnanngilaq suut tamaasa assigiissumik isiginngikkivut. Nunatsinni marlunni inuit pisinnaatitaaffii assigiinngitsorujussuarmik isigaavut, oqaloqatigiilluarpugulli ammasorujussuarmillu isummatsinnik taarseeqatigiilluta, Kristian Jensen Ritzaumut oqarpoq.
Nunamik isorinnittumik oqaloqatiginninneq
Ersissutiginngiliuk tikeraartitsisuit isornartorsiornissaa, tamannalu peqatigalugu qulakkeerniarlugu ingerlatsivinnik isumaqatigiissutinik atsioqatigiittoqarnissaa, Danmarkimi inuussutissarsiornermut iluaqutaasinnaasumik?
– Aap, tamanna ersissutiginngeqaara, nunanut allanut tunngsunut ministeri Ritzaumut oqarpoq.
– Taamatut isorinnittumik oqaloqatigiinneq aamma ingerlattarsimavarput Kinamut, Indonesiamut nunanullu allanut tikeraaraangatta. Angalagaangatta naleqartitat, Danmarkip sananeqaatai, illersortassavagut. Isumaqatigiissutinik immikkut ataatsimik marlunnilluunniit pissarniarluta qallunaat naleqartitaat tuniniassanngilagut, taanna oqarpoq.
/ritzau/