anorlertoqarnerani pisoq

Kunngissap ikaartarfikkoorsimanera pillugu politiit oqaaseqarfigineqarnissaa kissaatigineqarpoq

Ikaartarfissuup Storebætsbrop matoqqanerani kunngissaq Frederiup biilinik ingerlaarsimanera pillugu kunngikkormiut oqaaseqarnissaat politiinit piumasarineqarpoq

Kunngissaq Frederik

Kunngissaq Frederik akuersissuteqarnani ikaartarfikkut - Storebæltsbrokkut - biilersimanera pillugu Sydsjællandip aamma Lolland-Falsterip Politiivisa kunngikkormiunut nalunaarutigaat, politiini pisortaq Lene Frank aviisimut BT-mut ilisimatitsivoq.

- Akuersissuteqarnani ikaartarfikkut biilerpoq, BT-mut oqarpoq.

Kunngissaq Frederik ikaartarfikkut biilerluni ikaarpoq ikaartarfik anorlernerata nalaani matuneqarallarnerani arfininngornerup ualinerani sapaammilu unnukkut.

Navianarpoq
Pissuteqavissumik ikaartarfik matuneqartartoq Lene Frankip oqaatigaa.

- Anorlernerata nalaani ikaartarfikkut biilerneq navianarsinnaanera pissutigalugu ikaartarfik matuneqarallartarpoq.

- Ikaartarfik matuneqaraangat biilertut tamarmik unitsinneqarallartarput, biilip qanoq pitsaassuseqarnersoq aqqorissuserluunniit apeqqutaajunnaartarput.

Taamaalisoqaqqissanngitsoq
Sydsjællands- aamma Lolland-Falsterip politiivini pisortaq Steen Nørskov Ritzauimit apersorneqarpoq.

Kunngissap Frederiup ikaartarfikkoornissaa anguniarlugu kunngeqarfik akuersissummik piniarsimasoq oqaatigaa.

Taamaakkaluartoq politiinit akuersissuteqarnani ikaartarfikkoorpoq.

Tulliani taamatut pisoqaqqissanersoq Steen Nørskov aperineqarami ima akivoq:

- Sillimanissaq eqqarsaatigineqartuaannassaaq. Imatut pisoqarnerasulli siunissami pisoqaqqinnginnissaa naatsorsuutigineqassaaq.

Powered by Labrador CMS