angalaneq
Kunngissakkut qitornatik sisamat nunatsinni takutissavaat
Kunngissaq Frederik nuliani Mary Kalaallit Nunaannut tikeraaqatigippagu qitornatik ilagissavaat
Kunngissaq Frederik nulialu Mary aasaru nunatsinnukartussaasut aviisinit Sermitsiamit AG-millu jannuaarimi saqqummiunneqarpoq. Angalanerminni illoqarfiit nunaqarfiillu tunumiittut kitaaniittullu tikissavaat.
Danskit aviisiinit Billed-Blademit Her og Nu-mit nalunaarutigineqarpoq nunatsinnut angalanerminni pilersaarutitik suliaralugit naammassingajaleraat, tassani kunngikkormiut umiarsuaanni Dannebrogimi angalassallutik.
Sapaatip akunneri marlunni nunatsinni angalassapput, tikitaminnilu piffissaq sivisooq atortassavaat. Kunngissaq nulialu ukiut qulit qaangiupput nunatsinni angalaqatigeeqqaaramik - kateqqammernerminni angalagamik - piffissallu ingerlanerani sisamanik qitornaqalernikuullutik.
Naalagaaffiup sinniisaa Mikaela Engell jannuaarimi nassuiaavoq, kunngissakkut nunatsinni angalanissaminnut pilersaarutertik naammasseriarpat saqqummiunneqarumaartoq.
Sermitsiaq AG-llu oqaatigereerpaat kunngissaq ilaqutaalu Ilulissat Uummannarlu angalanerminni ilaatigut tikikkusukkaat.