Kunngikkormiut: Christian, Isabella, Ivalo aamma Minik Schweizimi atuassasut

Kunngissakkut qitornaat sisamat ukiortaap aallartinneranit piffissap ilaani Schweizimi nunat tamalaat akornanni atuarfimmi ulluinnarni najugaqassapput.

Prins Christian, prinsesse Isabella, prins Vincent (Minik) aamma prinsesse Josephine (Ivalo) ataasinngornermi januaarip 6-ani 2020-mi Verbierimi Schweizip kujataata kippasissuani Lemania-Verbier International Schoolimi sapaatip-akunnerini aqqaneq-marlunni atualissapput.

Taama kunngikkormiut tusagassiuutitigut paasissutissiipput.

Kunngissaq Frederiup aamma kronprinsessse Maryp qitornaasa Schweizimi piffissap ilaani ukiortaamiit atualernissaat oktobarimili saqqummiunneqarpoq.

Maannali meeqqat atualernisaannut ulloq tassa aalajangiunneqarsimalerpoq.

Qatanngutigiit taakkua sisamat atuarnertik naammassigunikku Gentoftemi Tranegårdsskolenimi atuaqatigiinni atuarnertik nangissavaat.

Kronprinsesse Mary 14-inik ukiullip prins Christianip, 12-inik ukiullip prinsesse Isabellap marlulissallu prins Vincentip aamma prinsesse Josephinep, januaarimik qulingiluanik ukioqalersussat, nunat tamalaat akornanni atuarfimmi atuarneranni Schweizimiinnerusassaaq.

Taamaattumik Maryp Danmarkimi pisortatigoortumik suliassai nalinginnaasumit ikinnerussapput. Kunngissaq Frederik periarfissaqaleraangami ilaquttaminut najuukkiartortarniarpoq.

Kunngissakkut atuariartortitsinermikkut qitornatik “nunat tamalaat akornanni ataatsimut misigisaqarnissaannik” periarfissikkusukkaat, kunngikkormiunit siusinnerusukkut paasissutissiissutigineqarpoq.

Kunngissaq Frederik meeraalluni nunani allani aamma atuartuusimavoq.

1982-imit 1983-imut Frankrigimi École des Rochesimi atuarfimmi nerisaqarfiutigisumi atuartuuvoq. Tassani nukkani, prins Joachim, atuartooqatigaa.

Prins Joachim aamma prinsesse Marie maannakkorpiaq Parisimi najugaqarput, prinsi Frankrigimi sakkutooqarnikkut aqutsisutut ilinniagaqarmat.

Aappariit qitornaat marluk, prins Henrik aamma prinsesse Athena, tamatumunnga atatillugu Frankrigimi illoqarfiit pingaarnersaanni atuarfimmi atuartuupput.

Prinsit taakkua marluk - kunngissaq Frederik aamma prins Joachim - nuliatik, qitornatik aamma dronning Margrethe peqatigalugit Aarhusimi Marselisborg Slotimi katersuussimaqqammerput, tassanilu juullisioqatigiillutik.