Kunngikkormiut tikeraarnerat
Kunngikkormiusut ataqqinassusillit Nunatsinniinnerminni pilersaarutaat
Kunngissakkut angalanerminni qitornatik angalaqatigissavaat
Kunngikkormiusut ataqqinassusillit Nunatsinni angalanerat nunatta kujataani aggustip aallaqqaataani aallartissaaq. Igaliku siullermik tikissavaat.
Igalikumi Inatsisartuni siulittaasuusimasumit Josef Motzfeldtimit tikilluaqquneqassapput, tassani savaateqarfiup oqaluttuassartaanut pingaarutillit tikinneqassallutik. Igalikumit Narsaliassapput, tassani Neqi A/S pulaassavaat, Inuili, utoqqaat illuat kiisalu aamma katersugaasivik pulaassallugu.
Qaqortumi pisussat
Alluitsup Paaliassapput ulluni angalaffiusuni aappaanni. Timersortarfimmi katerisimaartoqassallunilu nunaqarfimmi pisuttuaqatigiittoqassalluni. Nanortaliliassapputtaaq, tassani katersortarfimmeeqatigiittoqassaaq kiisalu atuarfik nutarterneqarsimasoq aamma pulaarneqassalluni.
Qaqortumi assigiinngitsunik pisoqarfiussaaq. Ilaatigut assileeqatigiittoqassaaq. Kunngissap nuliata Neriusaaq kisimiilluni pulaassavaa. Sulisartut Højskoliat aamma Ammerivik pulaarneqassapputtaaq.
Qinngasaarisarnermut akiuiniarneq
Paamiut aggustip sisamaani tikinneqassaaq. Suliniut Kammagiitta paasiniaaffigineqassaaq, tassani qinngasaarisarnerit qanoq anigorniarneqarnersut sammineqassalluni.
Qeqetarsuatsiaani meeqqanut paaqqinnittarfik Amauligaq pulaarneqassaaq, assigiinngitsullu aamma orninneqassallutik. Kunngissakkormiut Nuuliannginnerminni ullunni marlunni eqqissisimaassapput, tusagassiuutillu tikilluaqqusaassanngillat.
Nuummut tikippata aatsaat aqaguani pisortatigoortumik tikilluaqquneqassapput. Tassani pingaarutillit assigiinngitsut orninneqassallutik, soorlu Namminersorlutik Oqartussat, Pinngortitaleriffik Arctic Winter Games allallu.