naalagaaffeqatigiinneq

Kunngeqarfimmi naalagaaffeqatigiinnut inatsiseqarnissaq Alternativetip siunnersuutigaa

Kalaallit Nunaanni Savalimmiunilu pissutsit, kiisalu naalagaaffeqatigiinni suleqatigiinneq Folketingimi akunnerit sisamat sinnerlugit oqaluuserineqarput

Oqallinnermit Folketingimi assi

Tallimanngormat maajip 20-anni naalagaaffeqatigiinneq pillugu ukiumoortumik apeqqarissaarluni oqallinneq imaqa manna tikillugu sivisunersaavoq. Akunnerit tallimaata affaata missaanni Kalaallit Nunaanni Savalimmiunilu pissutsit, kiisalu naalagaaffeqatigiinni suleqatigiinneq folketingimut ilaasortat oqaluuseraat.

Naalagaaffeqatigiit nutaamik aaqqissuunneqarnissaa nunat isumaliutigisariaqarpaat, Rasmus Nordqvist (AL) isumaqarpoq. Alternativetip ´Free Association´ tapersersorpaa - tassa naalagaaffeqatigiinnut inatsit - naalagaaffeqatigiinnik nutarterutissatut.

Allanngulerfik

– Naalagaaffeqatigiit allanngulerfimmiipput. Tamatuma nutarternissaanut pimoorussinerulluni sulinissaq pisariaqarpoq, Kalaallit Nunaat Savalimmiullu namminersulivikkiartorneranni tapersersorusukkutsigit. Innuttaasut namminersulivikkusuppata tapersersorniarlugit annertunerusumik iliuuseqassaagut, Rasmus Nordqvist oqarpoq.

Pissusiviusut nutaat

– Inatsisit tunngaviusut politikkikkut pissusiviusunut nutaanut aqqutissiuussissapput, naalagaaffeqatigiinni suleqatigiinnitsinnik nutaamik paasinninnissamik nutaamillu ineriartortitsinissamik pisariaqartitsilersinnaasumik. Piffissaq ungasinnerusoq isigalugu periuseq ´Free Association´ namminersornermut inatsimmut taartissatut isumaliutigineqarsinnaavoq. Isumaqatigiissut taamaattoq naligiissumik suleqatigiinnermik sinaakkutsiisinnaavoq namminersulivinnissamik tunngavilimmik, politikeri oqarpoq.

Inatsisit tunngaviusut suliaraat

Magni Argep, Tjódveldi-meersup, aamma Sjúdur Skaalep, Javnadarflokkurin-imeersup, Savalimmiuni inatsisinik tunngaviusunik sulineq pingaartittorujussuuvaat. Christiansborgimi apeqqarissaarluni oqallittoqarnera ilutigalugu Savalimmiuni partiit naapeqatigiipput, savalimmiuni inatsisinut tunngaviusunut siunnersuut pillugu aallarnisaataasumik ataatsimiillutik.

Inatsisit tunngaviusut iluanni

Ministeriunerup Lars Løkke Rasmussenip (V) nalunaajaatini nangeqqippaa, tassa savalimmiut kalaallillu inatsisaat tunngaviusut qallunaat inatsisaata tunngaviusut iliuanniissasut.

– Ilisimaneqassaaq suna toraarlugu sulisoqarnersoq. Pineqarpat inatsisit tunngaviusut naalagaaffimmut namminersuvissumut, imaluunniit inatsisit tunngaviusut, Kalaallit Nunaat Savalimmiullu naalagaaffeqatigiinniikkallarneranni atuuttussat. Kingulliuppat taava qallunaat inatsisaata tunngaviusut iluanniissapput.

– Matumani oqaatigissavara inatsisinik atortitsinermut ministereqarfiup naalakkersuisut sinnerlugit inatsisit tunngaviusut atortuutimmagit. Tamanna inatsisinik atortitsinermut ministereqarfiup siusinnerusukkut 2010/11-mi Savalimmiunut allaaserisimavaa. Kaammattuutigissavara inatsisinik tunngaviusunik sulinermi allakkiat ilanngunneqarnissaat, Lars Løkke Rasmussen oqarpoq.

Siunnersuutit pingasut

Aalajangiinermi, Folketingimi amerlanerussuteqartut tapersersugaanni, partiit akuersaarpaat Kalaallit Nunaat Savalimmiullu qilersorsimanngitsumik namminneq inatsisinik tunngavissaminnik suliaqarsinnaapput, naalagaaffeqatigiinnerup iluani atorneqarsinnaasunik. Amerlanerussuteqartut tassaapput S, V, LA, AL, R, K kiisalu Aaja Chemnitz Larsen (IA), Sjúdur Skaale JF) aamma Aleqa Hammond (SIU).

Magni Argelli (T) tamanna taperserumanngilaa. Aamma Christian Juhl (EL) aammalu Karseten Hønge (SF) tapersiiumanngillat.

Taakkua siunnersuutigaat oqaasertai naalagaaffeqatigiinnermut imaluunniit qallunaat inatsisaannut tunngaviusunut innersuutitaqassanngitsut, tassa imatut oqaasertalerlugu ´Folketingip akuersaarpaa Savalimmiut Kalaallit Nunaallu namminneq inatsisinik tunngavissaminnik qilersorsimanngitsumik sulisinnaasut´.

Naalagaaffeqatigiinneq nukittorsarlugu

Dansk Folkeparti siunnersuutit pingajuannik saqqummiussivoq. Søren Espersen (DF) oqaaseqartutut oqalugiarnermini oqarpoq ministeriunerup naalakkersuisut siulittaasuat savalimmiunilu lagmandi suleqatigisariaqarai siunertaralugu ataatsimut kommissionimik pilersitsinissaq, taassumalu suliarissagaa siunnersuusiussallugu qanoq isilluni naalagaaffeqatigiinneq nukittorsarneqarsinnaanersoq.

Powered by Labrador CMS