silaannakkut angallanneq

Kulusuup mittarfiata pisiniarfiani isiginnaartitsisartut unnuisut

Timmisartumik ilaasut Nuummukartut Tasiilaliartullu Kulusumi silarlunnera pissutigalugu unnuipput. Mittarfiup pisiniarfiani isiginnaartitsisartut unnuipput

Lufthavnen i Kulusuk, her overnattede en teatergruppe i weekenden, mens de var strandet i bygden.

Isiginnaagassiaq 'Aningaannguaq' takutikkiartorlugu angalasut arfineq marluk Tasiilamukartut silarlunnera pissutigalugu Kulusumi akunnerup naanerani unnuipput.

- Silarlummit angumeritittooratta Kulusumi unnuivugut, Juaaka Lyberth Sermitsiaq.AG-mut oqarpoq.

Nuummukartut aamma kinguaattoortut
Arfininngormat nalunaaqutaq 12.00-nngunngitsoq Nuuliartussaq unitsinneqarpoq – timmisartoq ilaasoqarnani aallariaqqaaraluarpoq, mittarfik quasappallaaqimmat ilaasoqassanguni qangattarsinnaasimannginnami, kisianni aamma utiinnarpoq.

Hoteli ulikkaaqqammat mittarfimmi unnuiinnartariaqarsimallutik Juaaka Lyberth oqaluttuarpoq.

Taamaattumik mittarfiup pisiniarfiani unnuisariaqarsimapput.

Ersinartumik filmeeraliorneq
- Uagut misigisassatut pissanganartutut tiguarput, unnullu iluatsillugu isiginaartitsisartut ilaat teknikkerilu ’qulliit qamimmata ersinalaartumik’ filmeeraliorput” – ulaakkullu ’siniffitsinnut ullaakkorsiutissanik pajunneqaratannguarpugut.

- Angalasarnerpassuanni illoqarfinni assigiinngitsuni unnuisarfippassuit misilereertarnikuuvakka, aatsaalli mittarfiup utaqqisarfiani pisiniarfianilu ( international taxfree butik) unnuillunga misilippara. Amerlanerit bænkeni sinipput, marluk madrasseeqqani saattuararsuarni sinipput. Uanga natermi sinippunga madrasseeqqami, tæppipalaannguamik qipillunga, Juaaka Lyberth oqarpoq.

Naammagittaalliortoqanngilaq
Mittarfimmi unnuineq pitsaanerpaajunngitsoq oqaatigaa.

- Annertunerusumilli naammangittaalliortoqanngilaq, allamik periarfissaqannginnera tamatta takusinnaangatsigu. Allat sinnerlugit uanga oqaaseqarsinnaanngilanga, kisianni uagut isiginnaartitseqatigiit ”misilitatut pissanganartutut” tiguarput. Aqagukkut ullaakkorsiortinneqarpugut mittarfimmi, ullup qeqqanngitsorlu Tasiilamut ingerlaqqilluta, oqaluttuarpoq.

- Maaniinnerput atorluarniarparput. Teknikkereerput Hans Ole Amossen, Tasiilamiunik nipilersortunut nipilerinermik suliaqartartunik pikkorissaavoq. Ualeru isiginnaagassiap scenografia ikkussuutilissavarput, unnugulu nal. 19.00 filmi Anu Man takutereerutsigu, soqutiginnittunik kulturimik eqqumiitsuliornermillu suliaqartartunik uanga ataatsimeeqateqassallunga neqeroorutigaara. Aqagu isiginnaartitsissaagut, Juaaka Lyberth oqarpoq.

Powered by Labrador CMS