Kulturministeri toqungasumik panissaartoq
Joy Mogensen arfininngormat toqungasumik panissaarami Facebookikkut allappoq, inuunermi suut tamarmik isumaqannginnerat eqqarsaasersuutigalugu
Inuunermi suut tamarmik nassuiaasersorneqarsinnaanatillu isumaqartanngillat.
Kirke- og kulturminister Joy Mogensen (S) Facebookimini taamatut allappoq, tassani oqaluttuaraa, arfininngormat toqungasumik panissaarsimalluni.
- Paninga, Sarah, tallimanngornerup arfininngornerullu akornanni unnuakkut toqungalluni inunngorpoq. Aliasoqaanga, taanna allappoq.
- Inuunermili suut tamarmik nassuiaasersorneqarsinnaannginnerat isumaqartannginneralluunniit eqqarsaasersuutigaara, taanna allappoq.
Joy Mogensenip apriilip qaammataani nalunaarutigaa, ukiuni marlunni naartulersinnaannginnerminik suliartittareerluni angutip kinaassutsiminik isertortup anisuua atorlugu naartulersimalluni.
- Ilissinnut allanullu meerartaarniarlutik sorsuuteqartunut oqassaanga: Misilissimasat tamarmik iluaqutaasarput. Niviarsiaraatinga nipilersorfigalugulu erinarsorfigigaangakku naanni pikittarpoq, taanna allassimavoq.
Eqqaamasanni eriaginarnerpaatitassara
- Sivikitsunnguamik pakkullugu tigummiarakku asanninnermik annertuumik misigissuseqarfigaara. Eqqaamasanni tamanna eriaginarnerpaasussaavoq. Neriuuteqartuaannaritsi. Annilaangassanngilasi, upperisiulli. Meeqqat allanik taarserneqarsinnaanatik nalitoorujussuupput. Tamatuminnga upperisaqarnera annertuseqqiinnarpoq.
- Paneerannguara ilunni taamaallaat malugisimagaluarlugu, takungakku qanoq asatingilereersimallugu paasivara. Tamannaavorlu paninga ilissallugu aaliasuffiup nalaani eqqaammassallugu pingaaruteqarnerpaaq.
Joy Mogensenip panimmi inunngunngilaatsiarnermini sooq toqunera patsisissarsiuullugulu nassuiaatissarsiuukkusunngilaa.
- Inuunerup nalorninartoqartarnera akueriniarsarivara, tassa allatut ingerlasoqarsimasinnaagaluarneranik eqqarsaasersornaveersaarlunga, taanna allappoq.
Kulturministeri naasunnakkusunngilaq, akerlianik Landsforeningen Spædbarnsdød, panianut Sarah Antoinet Mogensenimut atsiuneqarsimasumut aningaasatigut tapiissuteqartoqarnissaa kissaatigineruaa.