Kulturip illorsua pisortassasiorpoq
Taseralik Sisimiuniittoq nutaamik pisortartaassaaq, Arnajaraq Støvlbæk ukiuni aqqanilinni kulturip illorsuaneereerluni, taakkunannga qulingiluani pisortaareerluni ingerlaqqikkusummat.
- Ukiut aqqanillit tunniusimallunga Taseralimmilu sulineq uummateqarfigingaarlugu sulereerlunga, misigisimavunga aquutip allamut tunniunnissaa piffissanngortoq. Pinngitsoorani tamanna suliffeqarfimmut uummarissaataassaaq, aamma nutaamik eqqarsartumik pisortartaarneq ajunngittuaannarpoq, Arnajaraq Støvlbæk tusagassiuutinut nalunaarut naapertorlugu taama oqarpoq.
Taanna juulip 31-anni soraassaaq, siulersuisullu atorfimmik inuttassarsiorneq Sermitsiaq.AG-p allagarsiivianut ilanngutereerpaat. Atorfimmut allagarsiussaq takuuk.
Eqqumiitsuliorneq
- Eqqumiitsuliorneq tunuliaqutigaara ilinniagaralugulu, ukiorpaalunnilu pinngorartitsisutut piumassusera tunulliuttareerlugu pissanganartumut pulasussanngorama nuannaarpunga, naak suleqatikka ungagigaluaqalugit, Arnajaraq Støvlbæk oqarpoq.
Kulturip illorsuani siulersuisunut siulittaasoq Jens Klaus Lennert oqarpoq:
- Arnajaraq Støvlbækip soraarniuteqarnera uggornanngitsuunngilaq, taamaattorli ingerlariaqqikkusunnera paasisinnaavara. Illoqarfitsinni kulturikkut illorsuaqalerneranit suleqataavoq innuttaasullu suleqatigalugit atorluarneqalernissaanik suliaqarluni.