Kulturimut aningaasaliissutit 3,3 millioner koruunit agguaanneqartut

Suliniutit 30-t Namminersorlutik Oqartussat kulturimut aningaasaliissutaannit aningaasaliiffigineqarsimapput. Ukiumut pingasoriarluni qinnuteqartitsisoqartarpoq, pingasoriarluni agguaasoqartarrpoq, siullermillu agguaassineq naammassineqaqqammerpoq.

Namminersorlutik Oqartussat tusagassiorfinnut nalunaarutaanni tamanna allassimavoq.

- Tamanna nuannaarutissaavoq eqqumiitsuliortortagullu suliaat pillugit nersualaarusuppakka. Filmiliortartut, nipilersortartut, assilissat atorlugit allanillu eqqumiitsuliortartut suliaat pingaartumik Covid-19-ip erloqinartumik atuunnerata nalaanni pingaaruteqarsimaqaat, angerlarsimaffimmi aliikkutariinnarnagit aammali anersaakkut pissarsissutaasaramik. Eqqissisittarpaatigut tamannalu peqqinnissaq eqqarsaatigalugu pingaaruteqarluinnarpoq. Taamaammat periarfissaq iluatsillugu eqqumiitsuliortortatta innuttaasunik nuannaartitsilersarnerannik qujassuteqarfiginiarpakka, Kultureqarnermut Naalakkersuisoq Ane Lone Bagger, 3,3 millioner koruuninik eqqumiitsuliortunut agguaassinermut atatillugu oqarpoq.

Aningaasat agguaanneqartut immikkoortitanik assigiinngitsunit sisamaneersut imatut agguaanneqarsimapput:

Kulturimut aningaasaliissutit

Kulturimut aningaasaliissutit aqqutigalugit suliniutit qulingiluat katillugit 790.000,00 kr-nik tapiiffigineqarput, taakkulu ilaatigut tassaallutik qaannat atortuinut sullivimmik pilersitsinissamut periusissamik suliaqarnissamut Timothæus Poulsenimut tapiissutit, ”Qanilaassuseq”-imut atugassatut videot immiussat inuttut attaveqaatit aqqutigalugit Moses Masik Marcussen-Mølgaardimit, Nuka Sørensenimit inuusuttunillu allanit saqqummersinneqartussat kiisalu Nuummi Eqqumiitsulianik Saqqummersitsiviup ukiut 48-t ingerlanerani eqqumiitsulianik saqqummersittarsimasaanik Kalaallit Inuiattut Ullorsiorneranni 21. juni 2020-mi saqqummersitsinissap piareersarneqarnera.

Filmiliornermik ingerlataqartunut aningaasat

Filmiliornermik ingerlataqartunut aningaasanit filmiliornermik pilersaarutinut arfineq sisamanut katillugit 1.405.323,00 koruuninik tapiissutinik tunniussisoqarpoq. Tassunga ilaallutik pisuusaartitsilluni filmiliassaq ”Piniartorsuaq” tapiiffigineqarpoq soorluttaaq Qasigiannguani timersoqatigiiffiup ”Kugsak-45”-ip pisimasuinnik tunngaveqarluni filmiliarineqarnissaanut Allan Jerimiassen tapiiffigineqartoq. Tamatuma saniatigut Pipaluk K Jørgensenip alianarlunilu quianartumik pissanganartuliaa ”Kaffemik” tapiiffigineqarpoq.

Atuakkat kalaallisoortut

Atuakkanut kalaallisut allatanik tapiissutaasartunit, suliat tallimat katillugit 742.550,00 kr.-nik taperneqarput. Inuit kakiortittarneri pillugit meeqqanut atuakkiornissamut Paninnguaq Lind Jensen aamma Frederik ”Kunngi” Kristensenip taalliai Jens Peter Olsenimit aaqqissorneqarsimasut ilaatigut tapiiffigineqarlutik.

Kulturimik sulialinnut aningaasaliissutit

Tamatuma saniatigut eqqumiitsuliortut arfinillit katillugit qaammatini 17-ini sulinissaminnut kulturikkut sulialinnut aningaasaliissutinit 220.000 kr.-nik tapiiffigineqarput. Tapiiffigineqartut ilagaat Dennis Lars Rosing videokkut isiginnaagassiap ”Oqaluttuarit” suliarinissaanut, Hans Jukku Noahsenillu KNR radio aqqutigalugu ukiup ingerlanerani aallakaatinneqartussamik podcast-imik immiussaa.