Kulturimut aningaasaliisoqarnera Aajap nuannaarutigaa
Danskit naalakkersuisuisa aningaasanut inatsisissamut siunnersuutaanni Kalaallit Nunaannut Savalimmiunullu immikkut suliniutinut 15 millionit koruuninik aningaasaliisoqassaaq
Danskit naalakkersuisuisa aningaasanut inatsisissamut siunnersuutaanni naalagaaffeqatigiinnut aningaasaliisoqassasoq allaatigineqarpoq.
- Naalakkersuisut Kalaallit Nunaat Savalimmiullu qanimut suleqatigerusuppai. Taamaattumik naalakkersuisut ukioq manna aammaarlutik Kalaallit Nunaannut, Savalimmiunut kiisalu Danmarkimi kalaallinut savalimmiormiunullu suliniutinut aningaasaliissallutik salliussipput. Piffissami 2019-2022-mi Kalaallit Nunaanni Savalimmiunilu suliniutinut ukiumut 15 millionit koruunit aningaasaliissutigineqartassapput.
Naalagaaffeqatigiit akimorlugit imminnut ilisarisimallualernissamut iluaqutissatut kulturip iluani sulianut aningaasat atorneqassapput. Tamannalu IA-p folketingimi ilaasortaatitaat Aaja Chemnitz Larsenip nunannaarutigaa.
- Kalaallit Nunaanni Savalimmiunilu kulturikkut suliniuteqarnernut aningaasaliisoqarnera nuanneqaaq. Siornaalli IA-p folketingimi tamanna immikkut suliniuteqarfigissallugu siunertarisimavaa, Sermitsiaq.AG-mut oqarpoq.