nersornaasiineq
Kulturikkut nersornaat Siiva Fleischerimut
Nipilersoqatigiinnik Zikaza-kunnik pilersitsisoq Siiva Fleischer nersornaaserneqarpoq
Nunatta kulturikkut suliaqarluarimasumut nersornaataa, 50.000 kr-inik aningaasartalik, ukioq manna erinarsortartumut, erinarsuusiortumut, nipilersortartumut nipilersoqatigiinnillu Zikaza-kkunnik aallarniisumut Siiva Fleischerimut tunninneqarpoq, kultureqarnermut Naalakkersuisoq Nive Olsen, pisarneq malillugu inuiattut ullorsiornitsinni nersornaasiimmat.
Aallartinneranniit kisiartanngortoq
Zikaza-kkut nuusiaanni sisamani erinnarsuutit amerlanerpaat Siiva Fleischerip taalliaralugillu erinniarai, nipilersoqatigiillu aallarteqqaarneranniit kisiartaalluni maannamut Zikaza-kkunni peqataalluni.
10.000-t
Zikazakkut nuannarineqarnerpaaffimmi nalaanni nuusiaat tunisaalluartaqaat, ilaat 10.000-it angullugit tunisaasimalluni. Zakaza-kullu kisiartaapput nuutinik amerlasoorsuarnik tunisisimanerminni ”puisip amianik nuusiamik” nersornaaserneqarsimasut.
Siiva Fleischer ´suli puigorneqanngilaq´ nunatsinnilu sumi tamaani suli tusarnaartitsisarluni.
Pikkorinnerpaat ilaat
Kulturimik suliaqarluarsimasunut nersornaasiinermini Katuami pisumi Nive Olsen Siiva Fleischer pillugu ilaatigut ima oqarpoq:
– Immikkuullarissumik erinaqarpoq nunatsinnilu erinarsortartut pikkorinnerpaat ilaattut isigineqarluni. Taalliai pingaarnertut ulluinnarni inuunermut tunngasuugajupput, tusarnaartullu nammineq takorluuisinnaassutsini atorlugu qanoq paasiumanerlugit isummersorfigisinnaavai. Taalliaasalu ilaat allat aamma inuttut assigiinngissutsitta aaqqiagiinngissutsittalu akuerinissaannut sammisuusarput, siunissatsinnilu nutaamut ingerlaqqinnissatsinnik oqariartortuusarlutik.
Inuunermut asanninneq
– Taallat oqaasertaasa sammisaat nunatsinni pissutsinut sammisarput, inuunermut, asanninneq aammalu inuunermi aporfissanut tunniutiinnannginnissamik oqariartortuusarlutik. Taalliat torrallallugit allatat tusarnersullu, tusarnaartut alutorisaat nuannarilluagaallu.
1982-imi pilersinneqarpoq
Naalakkersuisut Kulturikkut Nersornaat 1982-imi pilersippaat. Nersornaat 50.000 kr-nik aningaasartaqartoq (skatte peereerlugu) inummut ataatsimut arlinnulluunniit, peqatigiiffinnut kattuffinnulluunniit eqqumiitsuliornikkut kulturilerinikkulluunniit immikkut suliniuteqarsimasunut tunniunneqartarpoq.