Kulturikkut Nersornaat Pele Møllerimut tunniunneqarpoq
Inuiattut ullorsiornitsinnut atatillugu Naalakkersuisut kulturikkut nersornaammi aamma kajumissaammik nersornaammik tunniussipput
Nipilersortartoq Pele Møller Kulturikkut Nersornaammik tunineqarpoq.
Nersornaammik tunniussineq kulturikkut illorsuarmi Katuami Nuummiittumi ingerlanneqarpoq ullumi Inuiattut ullorsiornitsinni.
Pele Mølleri pillugu naalakkersuisoq Ane Lone Bagger ilaatigut oqarpoq:
- 1990-ikkut aallartinneranni Jazzimik nipilersortartuminik pilersitsisimavoq. Nipilersoriaaseq meeraanerminiit tusarnaartakkani, nipilersoriaasianullu sunniuteqarluinnarsimasoq.
Saqqummersitanut 17-inut peqataasimavoq. Saqqummersitat amerlanerit nammineq nipilersortartuni peqatigalugit, ilaallu nipilersortartut allat peqatigalugit saqqummersittarsimavai.
Taakku saniatigut nammineq nipilersuusiaminik guitarernermik ilinniutissamik DVD-mik saqqummersitsisimavoq, sunngiffimmilu ilinniartitsinermi, aamma allanut guitarertalerusuttunut, guitarernermik suli ilinniartitsisarpoq.
Filmiliortartumut kajumissaasiineq
Kajumissaammik nersornaaserneqartoq tassaavoq filmiliortartoq Jens Christian Lyberth Lennert.
Naalakkersuisut kajumissaatitut nersornaasiuttagaat 10.000 koruuninik aningaasartaqartoq 2016-mi pilersinneqarpoq. Taannalu inuusuttumut piginnaasalimmut Kulturikkut Nersornaasiisoqarnerani aamma tunniunneqartarpoq.
Naalakkersuisut Kulturikkut Nersornaat 1982-imi pilersippaat. Nersornaat 50.000 kr-nik aningaasartaqartoq inummut ataatsimut arlalinnulluunniit, peqatigiiffinnut kattuffinnulluunniit eqqumiitsuliornikkut kulturilerinikkulluunniit immikkut suliniuteqarsimasunut tunniunneqartarpoq. Nersornaat ukiut tamaasa Inuiattut Ullorsiornitsinni juunip 21-ani tunniunneqartarpoq.