Kulturikkut aaqqissuussaq taamaatiinnarneqartoq
Unnuk Kulturisiorfik 2022 coronap tuniluutingaatsiarnera pissutigalugu taamaatiinnarneqarsimavoq.
Nunatsinni kulturikkut pikialaartitsisarnerit annersaasa ilaat Unnuk Kulturisiorfik ukioq manna pilersaarutaasutut januaarip 22-ani ingerlanneqartussaagaluartoq taamaatiinnarneqarsimavoq. Nunatta Atuagaateqarfianit ilisimatitsissutigineqarpoq.
- Covid-19 peqqutaavoq. Takorloorsinnaagatsigu Unnuk Kulturisiorfiup anersaava atorlugu naammaginartumik illersorsinnaasumillu pisussaq ataqatigiissaarsinnaallugu. Siunissaq nalorninartoqarsinnaaqimmat taavalu pilersaarutit naatsorsuutigineqarsimagaluartut unitseriataarneqarsinnaammata, atuagaateqarfimmi pisortaq Elisa Petersen tusagassiorfinnut nalunaaruteqarluni allappoq.
Unnuk Kulturisiorfik ornigarneqarluartartuuvoq, innuttaasorpassuit nunami oqartussat, paaqqinnittarfiit suliffeqarfiillu immikkut ittumik paasisaqarfiginiarlugit tamanna periarfissaq atorluartarpaat.
Elisa Peterseip Sermitsiaq.AG-mut oqaatigaa, Unnuk Kulturisiorfik 2022 ukiakkut ingerlanniarlugu pilersaarusiortoqalereersimagaluartoq. Tassa coronamut allannguutaa nutaaq takkutinngikkallarmmat tuniluuttoqangaatsialinngikkallarmallu:
Eqqumiitsuliortutut peqataasussat piareersimagaluartut
- Ukiaq silarsuaq allaammata pitsanngorsaalluta ussassaaralutalu aallartissimagaluarpugut. Silarsuaq ammariartoqqilersimagaluarpoq, ilaatigullu Nuuk Nordisk Kulturfestivali ingerlassimavarput, neriuutigisimallutigulu ukioq manna Unnuk Kulturisiorfik aamma ingerlassinnaassallutigu.
- Frederik Elsnerip Ole Kristiansenillu Nunatta Atuagaateqarfianut tikilluaqqunissaat qilanaarisimagaluarparput, aamma inuppassuit pisareersarlutik aallartissimagaluarput illersorneqarsinnaasumillu peqataanissaminnut piareersimasimallutik. Tuniluuttoqarnerali naggataatigut ima annertutigilersimammat oqartariaqalersimavugut; Naamik, pikialaartitsinissaq ingerlassinnaanngilarput, Elisa Petersen oqaluttuarpoq.
Nunatsinni kulturikkut pikialaartitsisarnerit annersaasa ilaat Unnuk Kulturisiorfik Nunatta Atuagaateqarfiata 2000-imili aallartitaraa ataqatigiissaarisuuffigisarlugulu. Unnuk Kulturisiorfik kingullermik 2020-mi ingerlanneqarpoq.
Piffissami kingullermi nunami maani tuniluuttoqaqaaq. Nunatsinni Nakorsaaneqarfiup pingsunngornermi nalunaarutigaa, marlunngornermiilli tunillatsissimasut nutaat 270-it paasineqarsimasut, tassungalu atatillugu Nunatsinni Nakorsaaneqarfimmit kaammattuutigineqarpoq, innuttaasut tuniluuttoqarnera killilersimaarniarlugu sapinngisaminnik inunnik ikinnerpaanik naapitaqarniartassasut.