Kulturi eqqumiitsuliortarnerlu nunanit avannarlernit ukkatarineqartut
Uummaarissumik, eqeersimaartumik kiffaanngissuseqartumillu kulturilerisarnerup nunat avannarliit akornanni tatigeqatigiissitsisarnera aatsaat taamak pingaaruteqartigisoq, nunani avannarlerni kultureqarnermut ministerit isumaqarput.
Nunai avannarlerni kultureqarnermut ministerit maajip aallartinnerani Oslomi ataatsimeeqatigiipput, tassani kultureqarnermut naalakkersuisoq Peter Olsen (IA) peqataavoq.
Ataatsimeeqatigiinnermi paatsuugassaanngitsumik sakkortuumillu takutinneqarpoq, kiffaanngissuseqartumik eqqumiitsuliortoqartarneranut kulturilerisoqartarneranullu tunngavigilluarneqartartut inuiaqatigiinnut oqartussaaqataaffiusartunut pingaaruteqarluinnartut. Oqartussaaqataanermi naleqartitat, soorlu kiffaanngissuseqarluni oqaaseqarsinnaaneq, kiffaanngissuseqartumik tusagassiorsinnaaneq kiffaanngissuseqartumillu eqqumiitsuliorsinnaaneq nunani avannarlerni sumiiffippassuarni maliugassiuisarfiusuni tatineqarsimapput.
Eqqumiitsuliortarnerup kulturillu pingaaruteqassusaat
- Eqqumiitsuliortarneq kulturilerisarnerlu inuiaqatigiinnut oqartussaaqataaffiullutillu ammasumik ingerlanneqartunut tunngaviupput. Nunat avannarliit suleqatigiinnerannut, eqqissisimasumik nunani ingerlatsisoqarnissaanik suliniuteqarnermi pilersinneqarsimasumut taakku tunngaviit ilagaat.
- Nunani avannarlerni ministeriunerit Nunat avannarliit nunarsuarmi peqataatitsinerpaatut anguniagaannut kulturi inuttut nappanneqarsinnaasumik inuiaqatigeqarnissaanut pingaaruteqarpoq. Nunani avannarlerni ataatsimoorussamik kultureqarneq aamma nunat avannarliit peqataatitsiniarnerisa iluatsinneqarnissaanut annertuumik pingaaruteqarpoq. Piffissami nunat avannarliit Europallu ajornartorsiorfianni kulturikkut ataqatigiinnissamik pisariaqartitsineq aatsaat taamak annertutigisoq, Napamit tusagassiorfitsigut nalunaarummi allassimavoq.
Sipaarniuteqarfigineqartut
Kultureqarnermut ministerit kulturimut ilinniartitaanermullu aningaasartuutaasartunik ikilisaasoqarsimanera paasiuminaatsippaat.
- 2021-2024-mut nunani avannarlerni ministerit suleqatigiillutik missingersuusiaringallarsimasaanni, aningaasaliissutaasartut 20-25 procentimik appaaffigineqarnissaannik siunnersuutitaqarpoq. Tamanna ajuusaarnarpoq, kulturimi aamma kulturikkut suleqatigiinneq inunnik katersuutsitsisarmata, tassani oqaatigineqarpoq.
Kultureqarnermut ministerit taamaammat isumaqarput, kiffaanngissuseqarluni oqaaseqarsinnaaneq, kiffaanngissuseqartumik tusagassiorsinnaaneq kiffaanngissuseqartumillu eqqumiitsuliorsinnaaneq pillugit naleqartitat tatineqarsimaneranni nunani tamalaani taakku ukkatarineqarnissaat nunanit avannarlernit sulissutigineqartariaqartut.
- Oqartussaaqataanerup ajunngitsumik ingerlanneqarnissaanut aalajangiisuulluinnarpoq, kiffaanngissuseqartumik eqqumiitsuliortarnerup eqqarsartitsisarnissaa, oqallitsitsisarnissaa inuiaqatigiillu aaqqissuussaanerat eqqarsaatigalugu qisuariartitsisarnissaa, ataatsimeeqatigiissimasunit oqaatigineqarpoq.