Skip to main content

Kulturfestivali aallartinneqarpoq

Ullumimiit ullut marluk Aasiaani kulturfestivalertoqassaaq. Festivali Qeqertarsuarmi nipilersornertalimmik aallartinneqarpoq. Maanna festivali assigiinngitsunik imalik Aasianni ingerlaqqippoq.

Ulluni aggersuni nipilersortartut – ilisimaneqarluartut ilisimaneqannginnerulaalluunniit – Aasiammiunut nipilersorlutik aliikkusersuissapput, Qeqertarsuarmi festivalituut naammassineqaqqammertumituut.

Ole Kristiansen, Igalikumiut Kinguaavi aamma Inuk ilaatigut festivalimi erinarsuutinik marlussunnguanik appissapput.

Aaqqissuussisut silaginnissaanik neriuuteqarput, ulluni aggersuni seqinnarinniarpasippoq anorsaannguarlunilu, tassa silap qanoq innissaanut ilimasaarut upperissagutsigu.

- Aaqqissuussaq ilaqutariinnut tamanut aaqqissuussaavoq. Meeqqanut, inuusuttunut, angajoqqaanut aanaakkunnut aataakkunnullu peqartoqassaaq. Aaqqissuussallu imigassartaqanngitsumik ingerlanneqarnissaa toqqarsimavarput ilaqutariit qitiutinneqarnerat siunertaasoq ersersinniarlutigu, Aasianni sunngiffimmi pisortaq Dorannguaq Eriksen Nielsen nassuiaavoq.

Kulturi qitiutinneqartoq

Nipilersornerit saniatigut igasunngorniaq aanaap igaarisartangaattuulli kalaallit nerisassaataannik nerisassiussaaq. Innuttaasullu ussersinnaasaannik kalaaliminernik nerisassianik mamartulialiussaaq.

- Aammattaaq eqqumiitsuliortup, Aksel Brandtip, innuttaasut sanalunnermik ilinniartissavai. Piumasut sanalunnermik aallartinnermi ikiorneqassapput, pingasunngorpallu eqqumiitsuliat saqqummersinneqassapput, Dorannguaq Eriksen Nielsen oqarpoq.

Nipilersortartut piumasut tusarnaartitsissapput

Ullumimiit pingasunngorpat tungaanut aaqqissuussat ualimiit unnukkullu qulip tungaanut ingerlanneqassapput. Marlunngorpat nipilersortartut piumasut tusarnaartitsissapput piginnaasatillu tassani takutissinnaavaat.

- Erinarsuutiniit angakkuarnernut isiginnaartitsinernillu takutitsisoqassaaq, Dorannguaq Eriksen Nielsen qilanaarluni oqarpoq.

Aaqqissuussaq una kommunimi kingullersaajunnanngitsoq sunngiffimmi pisortaq ilisimatitsivoq. Kommuni ulluni makkunani misilittakkat atorlugit aaqqissuussaq kommunip illoqarfiini tamani ingerlanneqartalissanersoq aalajangissaaq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER