Kullorsuaq: Nunaqarfinnut pisassiissutit atuutilersinneqarlik
Kullorsuup eqqaa suli sikuusoq Upernaviup eqqaanilu nunaqarfinni sikuunikinnerusuni qilalugarniarneq ingerlanneqartarpoq, Kullorsuarlu sikueraangat pisassiissutit nungoreersimasarlutik. Taamaattumik paggatassiineq atorunnaarlugu nunaqarfinnut pisassiissutit atuutilersinneqartariaqartut Kullorsuarmi aalisartut piniartullu peqatigiiffiat isumaqarpoq.
Aqutsiveqarfik Upernavimmi nunaqarfiit avannarlersaanni Kullorsuarmi decemberimiik ilaatigut majip naanissaata tungaanut sikuusarpoq, taamaattumillu imaatigut qilaluarniarfissaasarani.
Aviisi Sermitsiaq taama allappoq.
Ukiulli kingulliit Upernaviup nunaqarfiisalu allat eqqaani sikuusarnera allanngoriartorpoq, imaatigullu qilalugarniarneq aallunneqarnerulerluni. Taamaattumik Kullorsuup eqqaa sikueraangat qilalugarniarfissanngorlunilu qilalukkanut pisassiissutit amerlanertigut nungoreersimasarput, tamatumalu kingunerisaanik Kullorsuarmi piniartut ikittuinnaat qilalukkanik pisaqaqataasarlutik.
Qilalukkat mattaat neqaallu piniartukkormiut aningaasaqarnerannut pingaarutilerujussuupput, aammali ullorsiornerni pinngitsoorneqarsinnaanatik. Taamaattumik aqutsiveqarfik Upernavimmi paggatassiilluni qilalugarniartarneq atorunnaarlugu, nunaqarfikkaartumik pisassiisalernissaq pisariaqartoq, Kullorsuarmi aalisartut piniartullu peqatigiiffianni siulittaasoq, Timoteus Petersen oqarpoq.
Pisassiissutilli amerlineqanngippata nunaqarfinnut pisassiisarnerup eqqunneqarnissaa ajornakusoorsinnaasoq, Avannaata Kommuniani kommunalbestyrelsimi aamma Inatsisartuni ilaasortaq Jens Napaattooq, Naleraq, oqarpoq.
Nunaqarfinnut kulturikkullu pisassiissutit
Qilalukkanut qernertanut qaqortanullu pisassiissutit Avannaata Kommunianit agguaanneqartarput. Aqutsiveqarfik Upernavimmi aalisartut piniartullu peqatigiiffiisa amerlanerussuteqartut kissaatigisaat malillugu, pisassiissutit paggatassiissutigineqartarput, aammali ilaatigut makitsinikkut pisassiissutigineqartarlutik.
- Qilalugarniarnerulli ingerlanerani sikuusarmat, Kullorsuarmi aalisartut piniartullu pisaqaqaaneq ajorput. Taamaattumik paggatassiilluni pisassiisarneq atorunnaarlugu nunaqarfinnut pisassiisarneq atuutilersinneqartariaqarpoq, Timoteus Petersen oqarpoq.
Aviisimi Sermitsiami atuarnerusinnaavutit. Aviisi uani pissarsiariuk:
