tusagassiuutit
Kukkunertik nassuerutigiumanngilaat
Naalakkersuisut Inatsisartunik qoqassiipput inatsisinillu avaqqutaaralutik aviisinut tapiissutit akuersissutigineqartut tunniunneqanngimmata. Maannalu aningaasat periarfeerupputIna
2,5 millioner koruunit Inatsisartuni amerlanerussuteqartunit aviisinut 2014-imi akuersissutigineqartut pissarsiarinissaat Sermitsiaq.AG-mut tamaviaarnarsinnaassaaq.
Naak aqutsinermut inatsisinik immikkut ilisimasallit, Aningaasaqarnermut Ataatsimiititaliaq isumaqatigiissoq Inatsisartunilu inatsisilerinermut immikkoortortaqarfik nalunaaraluartut tusagassiorfiup aningaasat pissagai, Kielsenip ilaasalu Inatsisartut inassutaat naalakkusunngilaat.
Ingerlatsivimmi imminut mattulluinnarsimavoq.
Naalakkersuisut siulittaasuata naalakkersuisoqarfiani pisortaq Søren Hald Møller naapertorlugu aningaasanik aallertoqarsinnaanngilaq.
- Naalakkersuisut Siulittaasuata Naalakkersuisoqarfiani siorna qinnuteqaat itigartinneqarmat nalilerneqarpoq naalakkersuisoqarfimmi aalajangiineq naapertuullunilu inatsisinik tunngaveqartoq. Naalakkersuisoqarfik suli taama isumaqarpoq. Tamannalu tunngavigalugu 2014-imi aalajangiinerup apeqqusernissaanut tunngavissaqanngilanga, oqarpoq.
- Naalakkersuisoqarfimmi pisortanngorlaatut toqqissisimanarpa naalakkersuisoqarfimmi sulisunnit paasissallugu nammineq 2014-imi aalajangiinerminnut isumaqataasut?
- Aap, suliaq inatsisinik tunngaveqarnersoq nalilersorneqarpoq, oqaatigineqareersutullu naliliisoqarpoq naalakkersuisoqarfiup naliliinera naapertuullunilu inatsisinik tunngaveqartoq, Søren Hald Møller akivoq.
Matoqqavoq
2014-imi Naalakkersuisut Siulittaasuata Naalakkersuisoqarfiani aviisinut tapiissutit uninngatinnissaannut aalajangertoqarmat naalakkersuisoqarfik inunnit pingasunit aqunneqarpoq: Aleqa Hammond, Svend Hardenberg aamma Mininnguaq Kleist.
Taakkunannga Mininnguaq Kleist kiserngorussimavoq. Pisortallu naalakkersuisoqarfimmi taamani suliamik ingerlatsisimaneq oqaaseqarfigerusuppallaarnagu. Apeqqutigineqarmat aviisinut tapiissutit inatsisaatsuliorluni tunniukkumaneqannginnissaannut kina aalajangiisimanersoq ima akisoqarpoq:
- Illup iluani sulinermut allakkianut tunngasunut paasissutissat tunniunneq ajorpavut.
Mininnguaq Kleist nangilluni oqarpoq, Inatsisartuni inatsisilerinermut immikkoortortaqarfimmi inatsisinik naliliinermut suliallu annertuumik kukkuneqarneranut tunngasoq naalakkersuisoqarfimmit oqaaseqarfiginiarneqanngitsoq.
- Taannami Naalakkersuisut Siulittaasuata Naalakkersuisoqarfianut tunniunneqarsimanngilaq, tupaallannartumik oqarpoq.
Inatsisartut inatsisinut tunngatillugu akissutaanni inerniliinerit naalakkersuisoqarfimmi ilisimaneqanngitsoorsimanavianngillat. Sapaatimmi akunnerata matuma siorna tamanna AG-mit naalakkersuisoqarfimmut tunniunneqarpoq.
Pissaanerup pingasunut avinneqarsimaneranut tunngaviusut malillugit Inatsisartut tassaapput Naalakkersuisut inatsisit malillugit pissaanermik aqutsinerannik nakkutilliisussat. Taamaattumik nalinginnaasumik ilungersunarluinnassaaq aningaasaqarnermut ataatsimiititaliaq isumaqatigiissoq naalakkersuisoqarfimmi suliamik ingerlatsisimanermik isornartorsiuissappat, soorlu tamanna pisoq aviisinut tapiissutinut tunngatillugu.
Suliamili tassanerpiaq Naalakkersuisut aningaasaqarnermut ataatsimiititaliamit aningaasat tunniunnissaannik innersuussineq tusaanngitsuusaassallugu toqqqarpaat.
IA-mi aningaasaqarnermut tunngasuni oqaaseqartartoq Naaja Nathanielsen Naalakkersuisut Aningaasaqarnermut Ataatsimiititaliap inassuteqaataanik suusupaginninnerannik ileqimisaarutiginnippoq.
- Aningaasanut inatsimmik nammineq iluarisaq malillugu atuisinnaaneq tunngavissaqarnersoq eqqarsaatigalugu isumaqarpunga Kim Kielsenip siulimi iliuusaa erseqqissumik akerlilertariaqaraa oqarlunilu taama pisoqaqqinnavianngitsoq, oqarpoq.
Allaaserisaq tamaat AG-mi sapaatip-akunnerani saqqummersumi matuma ataani pisiarisinnaasanni atuarsinnaavat.