Kukkunersiuneq: Nukissiorfiit taamaammat aningaasaqarnikkut ajornartorsiungaatsiarput
Nukissiorfiit annertuumik amigartooruteqarluni ingerlanera aamma milliardilikkaanik kinguleruttoornera, akinik assigiissitsilluni aaqqissuusseqqinnerup nalinginnaasumillu aserfallatsaaliinissamut aningaasaliinikinnerup kinguneraa. Ajornartorsiut aaqqinniarlugu akit qaffanneqartariaqarput, imaluunniit aningaasaliissutit qaffanneqartariaqarput, tamanna inerniliunneqarpoq.
Nukissiorfinni aningaasaqarnerup tatisimaneqarnerujussua pissutigalugu innaallagissamik pilersuinermut aamma erngup pitsaassusaanut sunniuteqarsinnaavoq. Pissutsit ilungersunarluinnarmata “pilersuinermi kipisooratarsinnaanermut aamma erngup pitsaassusaanut tunngasumik unammilligassaqarnerulertussaasoq” ingerlatseqatigiiffiup februar 2021-imi nassuiaammi inerniliuppaa.
Kukkunersiuisarfiup Deloittep Nukissiorfiit ukiuni arfinilinni aningaasaqarnerat, ingerlatsinermik kukkunersiuilluni misissoqqissaarpaa, Nukissiorfiit oqariartuutaa eqqornersoq paasiniarlugu.
Sermitsiaq.AG Deloittep ingerlatsinermik kukkunersiuineranik takunnikkumanikuuvoq, tassanilu Nukissiorfiit naatsorsuusiaat amerlanerit eqqortut inerniliunneqarpoq.
Aningaasaqarnikkut tatisimaneqarnermut pissutaasut Deloittep ilaatigut makku tikkuarpai:
- Nukissiorfiit akinik aaqqissuusseqqittoqarneraniilli 01.01.2018-mit annertuumik amigartooruteqartarpoq – assersuutigalugu 2020-mi 153 millionit koruuninik amigartooruteqartoqarpoq aamma 2021-mi 138 millionit koruuninik.
- Aserfallatsaaliinernut aningaasaleeqqinnernullu tunngatillugit unammilligassat misissuinerup ingerlanera tamaat piupput. Tamanna innaallagissamut, imermut kiassarnermullu akit appasitsinniartuarneqarnerannik pissuteqarsinnaapput. Tatisimanninneq suliffeqarfiup piffissaq qaninnerusoq eqqarsaatigalugu aserfallatsaaliinermut aningaasat annikillineqarneranik kinguneqarsinnaasoq – aamma piffissami akit naleqqunnerisa nalaanni taamaassinnaalluni.
- Ukiut nillertut qaffasissumik kaaviiaartitaqarfiusarput ingerlatsinermut aningaasartuutinik malunnaatilimmik qaffaaffiunngitsumik, ukiut kiattut appasinnerusumik kaaviiaartitaqarfiusartut malunnaateqarpallaanngitsumillu annikinnerusumik ingerlatsinermut aningaasartuuteqarfiusarlutik.
- Sammisat ukiumut annertussusiat 60-it missaannik qaffariarsimapput – taakkunannga ilinniartunit 20-t-
Nukissiorfiit ukiut tamaasa ukiuni tulliuttuni 2,4 milliarder koruuninik kinguleruttoornerit anguniarlugit saniatigut millioninik pisariaqartitsisassaaq.
Aningaasaliinerit ukiumut 350 millionit koruunit siunnersuutigigaat.
Aallaqqaammut 250-350 mio. kr. piffissami ukiuni marlunni pingasuni aserfallatsaaliinernut angummanniarluni aningaasaleeqqinnernut taaneqartartunut, Deloitte siunnersuuteqarpoq. Ukiunut 2018-2020-mut sanilliullugu 200-250 mio. kr.-nik amerlanerupput.
- Pilersuinermut pitsaassutsimullu isumannaatsuutitsinermut aarlerinartut annerit taama periusissatut pilersaarusiornikkut naammassineqarsinnaaneri nalilerneqarpoq, Deloitte allappoq.